Presidenti i Shteteve të Bashkuara, Barak Obama, dhe Sekretari i Përgjithshëm i NATO-s, Anders Fogh Rasmusen, hapën takimin e nivelit të lartë të NATO-s në Çikago dje, duke thënë se udhëheqësit botërorë do të përgatisin fazën e ardhëshme të tranzicionit në Afganistan gjatë dy ditëve të këtij takimi.
Zoti Obama u tha të pranishëmve se sfidat do të vazhdojnë dhe më shumë jetë do të humbasin, por “ne kemi besim se jemi në rrugë të mbarë dhe çfarë pasqyron ky takim i NATO-s është se bota e mbështet strategjinë që ne kemi përcaktuar”.
Udhëheqësit nga më shumë se 50 vende mbajtën një minutë heshtje për të respektuar mijëra trupat e koalicionit që u vranë ose u plagosën gjatë luftës në Afganistan.
Shefi i NATOs tha se aleanca nuk do të nxitohet për t’u larguar nga Afganistani. Ai premtoi se koalicioni do t’i çojë deri në fund operacionet e tij deri në momentin kur t’i kalojë përgjegjësitë e sigurisë në duart e qeverisë afgane brenda vitit 2014.
Presidenti Obama ka ftuar udhëheqësit e vendeve të NATO-s në Çikago për të riafirmuar planin për t’i dhënë fund misionit luftarak në Afganistan deri më 31 dhjetor 2014 dhe për të siguruar strategjinë e mbështetjes financiare për ekonominë dhe zhvillimin politik në Afganistan.
Për një çështje tjetër, aleanca e NATO-s thotë se sistemi i mbrojtjes nga raketat në Evropë është në fuqi.
Sekretari i Përgjithshëm i NATO-s, Anders Fogh Rasmussen tha dje në Çikago se sistemi është në fazën e ndërmjetme, me interceptorët e raketave të vendosur në një luftanije amerikane në Detin Mesdhe dhe një sistem radari në Turqi.
NATO-ja synon të ketë një rrjet mbrojtës funksional që mund të interceptojë një sulm me raketa kudo në Evropë deri në fund të këtij dhjetëvjeçari.
Ish presidenti i Shteteve të Bashkuara, Xhorxh W. Bush propozoi fillimisht një sistem raketash me bazë në tokë për të mbrojtur aleatët e NATO-s nga ndonjë sulm i mundshëm nga Irani ose qeveri të tjera armike. Presidenti Barak Obama e modifikoi më vonë planin, duke vendosur disa nga radarët në luftëanije.
Sistetmi i mbrojtes nga raketat krijoi tension mes Shteteve të Bashkuara dhe Rusisë, e cila e shkoi sistemin se kërcënim për sigurinë e saj. Kremlini ka kërcënuar se do të vendosë raketa luftarake në kufijtë e Rusisë me NATO-n, nëse planet e alenacës vihen në zbatim.
Uashingtoni dhe NATO-ja e kanë ftuar Rusinë të marrë pjesë në mbrojtjen nga raketat. Ata thanë se sistemi mbrojtës nga raketat nuk ka në asnjë mënyrë si objektiv Rusinë.
Udhëheqësit nga më shumë se 50 vende janë mbledhur në Çikago për takimin e nivelit të lartë të aleancës
