Në kërkim të burimeve alternative të energjisë, vaji i bimëve është duke u përdorur gjithnjë e më shumë për të zëvendësuar naftën e papërpunuar. Karburanti për makinat që punojnë me naftë mund të prodhohet me lehtësi nga bimë si soja ose vajra të tjera që zakonisht përdoren në kuzhinë. Por, rreth 115 kilometra larg Uashingtonit, një kompani po punon për prodhimin e bio-karburantit. Synimi i kompanisë është që i gjithë procesi të kryhet në një vend. Drejtuesit e kompanisë thonë se ky është një sistem që mund të funsionojë kudo në botë.
Patatet e skuqura janë një artikull i njohur në restorantin Corck Street Taverna në Winchester të Virxhinias. Ato përgatiten në forma të ndryshme dhe shkojnë mirë me shumë ushqime të tjera.
Menaxheri i kuzhinës Chris Bennett e blen vajin vegjetal nga Shenandoah Agricultural Products, një kompani e vogël që gjendet vetëm pak kilometra larg.
“Është mirë të ndihmojmë popullatën lokale”.
Pas përdorimit të vajit për skuqje, kompania ka plane për një përdorim tjetër të tij.
“Ata do ta kthejnë atë në bio-karburant”.
Bio-karburanti është naftë e prodhuar nga bimët. Kompania Shenandoah ka një fermë dhe pajisjet për prodhimin e bio-karburantit. Diane Kearns është drejtuese e kompanisë.
“Gjithçka është pjesë e një procesi më të madh. Dhe nëse ne mund të prodhojmë gjëra të ripërtëritshme, të cilat nuk dëmtojnë mjedisin, atëherë kjo me të vërtetë është një ndihmë e madhe. Çdo gjë duhet gjithashtu të jetë ekonomike”.
Bujqësia është në rënie në këtë rajon, ndërkohë që lagjet në periferi gradualisht po zgjerohen. Zonja Kearns thotë se ajo dëshiron të gjejë një mënyrë për të mbajtur gjallë bujqësinë lokale dhe në të njëjtën kohë të ndihmojë në ruajtjen e mjedisit. Ajo mendon se bio-karburet mund të ndihmojnë në këtë drejtim. Por ajo thotë se nuk po e bën këtë për para.
“Nuk e bëjë këtë për të fituar një milion dollarë. Thjeshtë e bëj këtë sepse dua të fuqizoj bujqësinë lokale dhe të vërtetoj se prodhimet e ripërtëritshme të këtij lloji janë të mundshme”.
Prodhimi i bio-karburantit është një industri në rritje në mbarë botën. Por zonja Kearns dhe partnerët e saj dallojnë nga të tjerët. Ata i bëjnë të gjitha. Zonja Kearns merret edhe me kultivimin e bimëve vegjetale. Partneri i saj Josh Leidhecker i shëndrron bimët në vaj për skuqjen e patateve, të cilin ia shesin restoranteve lokale.
“Ky është rezultat i vajit, punës, dhe krenarisë amerikane”.
Pastaj vajin e përdorur ata e kthejnë në bio-karburant përmes një sistem që zoti Leidhecker e ka projektuar dhe ndërtuar vetë.
“Unë nuk kam ndonjë trajnim formal në inxhinieri. Por thjeshtë gjithmonë kam qenë i dhënë pas këtyre gjërave”.
Ai ka gjetur një mënyrë për të vendosur të gjitha pajisjet brenda një rimorkio traktori.
“Ne donim të ndërtonim një sistem të lëvizshëm, të cilin mund ta përdorim për të prodhuar lëndë djegëse për konsumatorët kudo që ata ndodhen”.
Pasi ky sistem është i lëvizshëm, dhe procesi kimik është i thjeshtë, ai thotë se mund të funksionojë kudo në botë ku fermerët kultivojnë bimët e nevojshme për prodhimin e vajit.
Zonja Kearns thotë se sistemi është gjithashtu ekonomik. Shpenzimet e tyre për prodhimin e bio-karburantit janë pothuajse të njëjta me çmimin e naftës, të cilën ata e blejnë në treg.
“Me një diferencë të vogël fitimi, kostoja i afrohet çmimit të naftës në treg. Prandaj unë jam i kënaqur me këtë”.
Ata madje mund ta shesin vajin e tyre për një çmim më të ulët se sa konkurrentët e tyre, duke bërë që Chris Bennett të jetë i kënaqur.
“Unë mendoj se është një ide e mirë, veçanërisht pasi tani gazi kushton më shumë se qumështi. Kjo do të na kursej para, do t’i kursejë atyre para, dhe do të ndihmojë në ruajtjen e mjedisit”.
Kjo ndihmon edhe fermerët lokalë.