Lidhje

Bulqizë, nxirren trupat e tre minatorëve kinezë


Bulqizë, nxirren trupat e tre minatorëve kizezë

Pas gjashtë ditë kërkimesh, gjatë paradites u nxorrën trupat e pajetë të tre minatorëve kinezë, të cilët humbën jetën në thellësitë e minierës së Bulqizës pas shpërthimit të gazit hidrogjen në nivelin 21 të minierës. Nga shpërthimi mbetën të plagosur edhe tre minatorë të tjerë, gjithashtu shtetas kinezë.

Aksidenti në minierën e Bulqizës ndodhi të shtunën në mesditë, në thellësinë rreth 2 mijë metër, ku po kryheshin punime për hapjen e një pusi të ri për shfrytëzimin e mineralit të kromit. Për shkak të thellësisë dhe shpërthimeve të vazhdueshme të gazit, operacioni i kërkim-shpëtimit ishte mjaft i vështirë.

Miniera e Bulqizës është marrë për shfrytëzim me konçension nga kompania “Albachrom”, ndërsa një kompani kineze është kontraktuar prej saj për kryerjen e punimeve në nivelin 21 për hapjen e një fronti të ri për shfrytëzimin e mineralit.

Rreth aksidentit të ndodhur në minierën e Bulqizës sot u prononcua edhe Presidenti Bujar Nishani, i cili u shpreh se gjen rastin të përsërisë apelin e tij institucional, por edhe njerëzor, që të merren të gjitha masat e nevojshme teknike në mënyrë që ngjarje të tilla të rënda e tragjike të mos përsëriten më në galeritë e minierave shqiptare si dhe të vënies para përgjegjësisë së shkaktarëve të mundshëm.

Vitet e fundit, në minierën e Bulqizës kanë ndodhur aksidente të përsëritura që kanë marrë jetën e mjaft minatorëve.

Minierat, që funksionojnë në Veri të Shqipërisë, vazhdojnë të kenë mungesë të kushteve të domosdoshme teknike dhe rrezikshmëri të lartë, kjo për shkak të vjetërsisë së tyre, pasi pjesa më e madhe i përkasin shekullit të kaluar dhe periudhës komuniste.

Mendimi juaj

Trego komentet

XS
SM
MD
LG