Shtetet e Bashkuara kanë udhëzuar burime të mëdha ushtarake në Oqeanin Paqësor për të ofruar ndihmë emergjente për viktimat e tërmetit në Japoni.
Presidenti Barak Obama u tha gazetarëve në Uashington se ai ka folur me kryeministrin japonez Naoto Kan dhe i ka ofruar atij ndihmë. Ai tha se një aeroplanmbajtëse tanimë gjendet në Japoni së bashku me burime tjera ushtarake, dhe një aeroplanmbajtëse tjetër është duke udhëtuar në drejtim të Japonisë.
Gazeta e ushtrisë amerikane Stars & Stripes citoi zëdhënësin e flotës së shtatë Jeff Davis të ketë thënë se një flotilje anijesh që udhëhiqet nga aeroplan-mbajtësja USS Ronald Regan ka ndërruar kurs dhe është nisur për të ndihmuar Japoninë. Ky grup i anijeve ishte nisur për të marrë pjesë në stërvitjet e përbashkëta ushtarave në Korenë e Jugut.
