Presidenti rus Vladimir Putin thotë se këtë vit arsenalit bërthmamor të vendit do t’i shtohen mbi 40 raketa të reja balistike ndërkontinentale.
Duke folur në hapje të ekspozitës ushtarake “Army-2015” të organizuar nga Ministria ruse e Mbrojtjes, pranë Moskës, zoti Putin tha se raketat e reja “do të jetë të afta për të shmangur edhe sistemet mbrojtëse më të avancuara të teknologjisë anti-raketë.
Sipas Departamentit amerikan të Shtetit, Russia aktualisht ka të dislokuara 515 raketa balistike ndërkontinentale, ka raketa balistike në nëndetëse dhe bombardues të rëndë, me një kapacitet prej gjithsej 1 mijë e 582 mbushjesh bërthamore.
Komentet e presidentit rus bëhen ndërsa janë shtuar tensionet mes Rusisë dhe vendeve të NATO-s, lidhur me konfliktin në Ukrainën lindore. Komentet po ashtu pasojnë njoftimet e shtypit të huaj, se Shtetet e Bashkuara janë duke planifikuar vendosjen e përhershme të armatimeve të rënda bërthamore dhe të trupave amerikane në Evropën Lindore dhe në shtetet balltike.
Duke komentuar për këto njoftime, zëdhënësi i Shtëpisë së Bardhë tha se
“plani për dislokimin e armatimeve dhe të personelit ushtarak është ende në fazat e para të procesit të formulimit të politikave, por ai është në përshtatje me strategjinë tonë të mëparshme. Presidenti Obama, - tha zëdhënësi, - i kushton rëndësi të madhe angazhimit të SHBA për të mbrojtur aleatët e NATO-s.
Ministria e Jashtme ruse po ashtu komentoi lidhur me dislokimin e planifikuar, duke paralajmëruar se ky veprim mund të provokojë konfrontim ushtarak me pasoja të rrezikshme.