Kryeministri Sali Berisha deklaroi sot se po pret që të bashkëpunojë me çdo bashkiak të zgjedhur në 8 maj për të realizuar projekte zhvillimi. Zoti Berisha tha në mbledhjen e grupit të deputetëve demokratë se bashkëpunimi mes qeverisë qendrore dhe asaj vendore është i kushtëzuar nga dëshira e madhe dhe kërkesat e qytetarëve për të zhvilluar Shqipërinë.
Sipas tij, projekti i përbashkët i të gjithëve është “Shqipëria një vend i zhvilluar në infrastrukturë, arsim dhe ekonomi”. Zoti Berisha tha se “vendimet e Kolegjit për zgjedhjet vendore janë një fitore e shtetit ligjor”, sepse shteti ligjor është parakushti që shoqëria të mbetet e lirë dhe që qytetarët të mbrojnë të drejtat e tyre. Ai tha se Kolegji Zgjedhor i shpalli të rregullta vendimet e KQZ për të numëruar votat e hedhura gabim, dhe kjo duhet respektuar si veprim në mbështetje të lirive njerëzore, ku liria e zgjedhjes me votë zë një vend kryesor.
Por komentet e kryeministrit Berisha kanë si anë tjetër të medaljes skepticizmin e socialistëve për mbarëvajtjen e zgjedhjeve vendore. Partia Socialiste njoftoi se do të vazhdojë “betejën e saj ligjore për të provuar shtrembërimin e rezultateve zgjedhore”. Ata i mbeten qëndrimit se kanë fituar shumicën e njësive administrative në të gjithë territorin, përfshi edhe bashkinë e Tiranës, ku rezultati u përmbys me numërimin e votave shtesë, herë të quajtura të kontestuara, e herë të pavlefshme. Edhe pas vendimit të Kolegjit Zgjedhor, socialistët besojnë se votat u shtrembëruan dhe u vodhën, dhe se ata pritnin që Kolegji të fliste në favor të tyre.