Lidhje

SHBA: Bashkëpunëtorët e Giulianit përballë prokurorëve


Një biznesmen ukraino-amerikan që ka lidhje me avokatin personal të Presidentit Donald Trump nuk mund të mbështetet tek privilegji ekzekutiv për të mbrojtur provat nga prokurorët, të cilët e akuzojnë se u ka kaluar para në mënyrë të paligjshme disa kandidatëve politikë në SHBA, thanë ekspertët ligjorë.

Të mërkurën, Lev Parnas deklaroi se ishte i pafajshëm përpara një gjykate federale në Manhatan.

Ai akuzohet se ka përdorur një kompani guackë për t’i dhuruar para një komiteti zgjedhor pro-Trump dhe se ka mbledhur para në mënyrë të paligjshme për një ish-kongresmen, si pjesë e përpjekjeve që presidenti të shkarkonte ambasadoren e SHBA në Ukrainë.

Rudy Giuliani, avokati personal i zotit Trump, ka thënë se Parnas dhe i pandehuri tjetër Igor Fruman ndihmuan përpjekjet e tij për të hetuar rivalin politik demokrat të presidentit Trump, ish nënpresidentin Joe Biden, dhe djalin e tij Hunter Biden për punën e tyre në Ukrainë.

Çështja është në qendër të një hetimi që kanë ndërmarrë demokratët me synimin për të shkarkuar Presidentin Trump. Presidenti republikan e ka quajtur hetimin përpjekje për të hedhur baltë mbi të.

Zoti Giuliani gjithashtu ka përfaqësuar si avokat biznesmenët Parnas dhe Fruman si personalisht ashtu edhe në çështje të biznesit.

Facebook Forum

XS
SM
MD
LG