Italia thotë se të gjithë pasagjerët janë nxjerrë nga trageti që mori flakë pranë brigjeve të Korfuzit. Incidenti shkaktoi tetë të vdekur. Kryeministri italian Matteo Renzi tha kapiteni i tragetit dhe një numër i vogël pjesëtarësh të ekuipazhit qëndruan në bordin e tragetit, pasi ishin nxjerrë të gjithë pasagjerët, ndërkohë që kanë filluar përpjekjet për ta sjellë mjetin lundrues në port. Zoti Renzi vlerësoi operacionet e shpëtimit që, siç u shpreh ai, parandaluan një kasaphanë në det.
Zyrtarët grekë thanë se 432 pasagjerë dhe pjesëtarë të ekuipazhit u nxorën nga trageti, shumë prej tyre të ngritur nga bordi me helikopterë shpëtimi. Temperaturat e ulëta, erërat e forta dhe dallgët e trazuara i vështirësuan operacionet e shpëtimit.
Pasagjerët e nxjerrë nga trageti rrëfenin skena kaotike pasi shpërtheu zjarri dje, duke e nxjerrë tragetin jashtë kontrollit dhe duke e lënë në mëshirën e dallgëve.
Në tragetin Norman Atlantic ndodheshin edhe 22 shqiptarë, të cilët siç konfirmoi sot ministrja e Mbrojtjes Mimi Kodheli janë evakuuar që të gjithë. Në operacionin e ndihmës krahas forcave italiane e greke u angazhua dje per rreth 14 ore, dhe një anije e Rojes bregdetare shqiptare, “Butrinti” e cila sot u zëvendësua nga një tjetër mjet i marinës ushtarake shqiptare.
Trageti po transportonte makina dhe pasagjerë nga porti grek i Patras drejt Ankonas në Itali. Zyrtarët thonë se trageti ishte kontrolluar më 19 dhjetor në Patras, ku ishin vërejtur probleme të vogla, të cilat ishin riparuar.