Lidhje

Valdeta Mehanja, një pilote nga Kosova


26 vjeçarja Valdeta Mehanja vitin e kaluar mori liçencën e pilotit nga Administrata Federale e Aviacionit në Shtetet e Bashkuara. Ajo është duke studiuar në Universitetin e Aeronautikës Emry-Riddle në Florida dhe në të njejtën kohë është instruktore për trejnimin e pilotëve të ardhshëm. Gjatë një bisede me kolegun Festim Gashi, Valdeta përshkruan rrugën e saj drejt realizimit të endrrës për t’u bërë pilote dhe planet e saj për të ardhmen.

Valdete Mehanja, shtetase e Kosovës, thotë se marrja e liçencës së pilotit në Shtetet e Bashkuara ishte një ndjenjë e papërshkrushme dhe inkurajuese për të. Ajo mendohet të jetë shtetasja e parë e Kosovës që pajiset me liçencën e pilotit nga Administrata Federale e Aviacionit në SHBA që nga shpallja e pavarësisë së Kosovës më 17 shkurt 2008.

“Ishte një ndjenjë e papërshkruar. Është një arritje që nuk e kisha menduar. Madje as familja ime nuk ka besuar derisa e mora liçencën. Kështu që ishte një ndjenjë shumë e mirë”.

Frymëzimi dhe dëshira për t’u bërë pilote i lindën gjatë kohës kur ajo punonte për qeverinë amerikane në Afganistan. Gjatë punës katër vjeçare në Afganistan, Valdeta Mehanja është marrë me programimin e pajisjeve të komunikimit dhe kompjuterëve për helikopterët.

“Atje kam punuar për katër vite. Nuk kam dashur ta lëshoja punën sepse zemra më rrihte për fluturim. Mandej, kur kam dëgjuar për Universitetin e Aeronautikës Embry-Riddle dhe jam pranuar në këtë shkollë, e kam kuptuar që dua të fluturoj”.

Pas pranimit në Universitetin e Aeoronautikës Embry-Riddle, Valdeta vendosi të investonte të gjitha kursimet që kishte grumbulluar nga puna e saj 6 vjeçare në Afganistan dhe në Irak për marrjen e liçencës së pilotes dhe mbulimin e shpenzimeve të shkollës. Ky vendim nuk ishte i lehtë për të sepse përmes punës ajo ka mbështetur financiarisht edhe familjen e saj në Prishtinë. Ajo thotë se në fillim prindërit kishin hezitime lidhur më këtë ide.

“Prindërit gjithmonë më kanë mbështetur në fund. Normalisht, në fillim kur i tregova se do t’i shfrytëzoja të gjitha kursimet që i kam grumbulluar për gjashtë vite, prindërit reaguan dhe ishin shumë të befasuar”.

Por, ajo thotë se është e kënaqur me investimin që ka bërë.

“Ka qenë një investim i mirë sepse kur mora liçencën dhe fillova punën si instruktore, prindërit e mij ishin krenarë. Pra, ishte një investim me vlerë”.

Pas mbarimit të studimeve Valdeta Mehanja do të vazhdojë punën si instruktore dhe do të bëjë më shumë orë fluturimesh për të fituar më shumë eksperiencë si pilote.

“Së pari do të mbaroj studimet, pastaj duhet të qëndrojë një vit për të marrë më shumë eksperiencë sepse për pilotët orët e fluturimit janë shumë të rëndësishme. Puna në rolin e instruktores të ndihmon shumë sepse mund të mbledhësh shumë orë fluturimi. Nëse punon si pilote për avionë komercialë nuk fluturon çdo ditë, kurse në rolin e instruktores unë fluturojë çdo ditë”.

Valdeta Mehanja vitin e ardhshëm do të mbarojë studimet në Universitetin Embry-Riddle në degën e Shkencave të Aeronautikës dhe shpreson që në një të ardhme të afërt të fluturojë në drejtim të Kosovës.
XS
SM
MD
LG