Viti 2010 për Kosovën ishte periudhë e përballjes me ngjarje të furishme si në rrafshin e brendshëm edhe atë ndërkombëtar. Opinioni i Gjykatës Ndërkombëtare të Drejtësisë, e cila tha se pavarësia e Kosovës nuk bie ndesh me të drejtën ndërkombëtare, ishte zhvillimi më pozitiv për shtetin e ri, i cili u përball ndërkaq me shumë probleme që çuan në zgjedhje të parakohshme parlamentare. Por, kulmin e shënoi raporti i të dërguarit të Këshillit të Evropës, Dik Marti, i cili hodhi akuza ndaj kryeministrit të Kosovës, Hashim Thaçi, për përfshirje ne veprimtari të paligjshme, veç tjerash edhe trafikimin e organeve njerëzore.