Live Blog: SHBA, Obama fiton zgjedhjet

Rezultatet paraprake tregojnë se Presidenti Barak Obama ka mundur rivalin e tij republikan Mit Romney.
Sipas rezultateve të raportuara deri në mesnatë sipas orës së kryeqytetit Uashington, demokrati Barak Obama ka siguruar 290 vota elektorale dhe zoti Romney ka marrë 203 vota.

Sipas rezultateve paraprake, zoti Obama ka siguruar fitore në mbi 20 shtete si dhe në kryeqytetin e vendit Uashington. Presidenti fitoi në shtete të rëndësishme si Ajova dhe Pensilvani. Zoti Romney siguroi fitore në shtetin e lëkundur të Karolinës së Veriut dhe në Indiana. Për momentin ende nuk mund të parashikohet rezultati për shtetet Florida dhe Virxhinia.

Presidenti amerikan Barack Obama i tha popullit amerikan, se “ditët më të mira janë para nesh” pasi ai fitoi ndaj rivalit të tij republikan Mitt Romney për një mandat të dytë.

Zoti Obama falenderoi përkrahësit e tij që brohorisnin në fjalimin e tij në orët e para të mëngjesit në Çikago, duke u thënë se “detyra e për ta bërë bashkimin tonë edhe më të përkryer vazhdon”. Ai tha se “ne jemi në familje amerikane dhe ne biem dhe ngrihemi së bashku si një vend dhe si një popull”.

Zoti Obama falenderoi gjithashtu kundërshtarin e tij republikan Romney dhe kandidatin republikan për nënpresident Paul Ryan për një fushatë të fortë. Ai tha se megjithëse ai dhe zoti Romney kishin pikëpamje shumë të ndryshme për çështjet, ata të dy kanë një dashuri të madhe për vendin.

Pak para se të fliste Presidenti, zoti Romney pranoi humbjen në një fjalim para përkrahësve të tij të zhgënjyer në Boston të Masaçusetsit, shteti ku ai ka qenë më pare guvernator. Ai e uroi presidentin Obama për fitoren dhe tha se shpresonte që në këtë moment që përbën sfidë për vendin, ai lutej që Presidenti të ishte i suksesshëm.

Sipas rezultateve të fundit paraprake nga zgjedhjet e djeshme, zoti Obama ka fituar 303 vota elektorale dhe zoti Romney 206. Një kandidati i duhen 270 vota për të fituar zgjedhjet.

Udhëheqësit botërorë po dërgojnë urimet e tyre për presidentin amerikan Barak Obama, i cili fitoi një mandat të dytë në një garë të fort me sfiduesin republikan Mitt Romney.

Sekretari i Përgjithshëm i OKB Ban Ki-mun tha se ai "ngrohtësisht uron" zotin Obama dhe pret të vazhdojë bashkëpunimin "në frymën e partneritetit të qëndrueshëm mes Shteteve të Bashkuara dhe Kombeve të Bashkuara." Ai vuri në dukje disa nga sfidat që shtrihen përpara - duke përfshirë përfundimin e gjakderdhjes në Sirinë e shkatërruar nga lufta.

Kryeministri izraelit Benjamin Netanyahu tha se aleanca strategjike mes Izraelit dhe Shteteve të bashkuara është më e forte se kurrë dhe do të vazhdojë të punojë me presidentin Obama. Zoti Netanyahu është një mik i ngushtë me zotin Romney, sfiduesin e presidentit.

Presidenti rus Vladimir Putin i dërgoi një telegram zotit Obama me urimet e tij, ndërsa zëdhënësi i zotit Putin tha se presidenti e priti lajmin “me shumë pozitivitet”.

Kryeministri britanik David Cameron dërgoi një tweet me urime të përzemërta dhe tha se pret të vazhdojë punën me presidentin. Por në një vizitë në Jordani sot, zoti Cameron u tha gazetarëve se zoti Obama ka nevojë të bëjë më shumë për të ndihmuar në fundin e luftës civile në Siri.

Udhëheqësit në Kenia, vendi i të jatit të zotit Obama vlerësuan rizgjedhjen e presidentit.

Gjyshja e zotit Obama jeton në fshatin Kogelo ku ajo dhe banorë të tjerë festuan rezultatin e zgjedhjeve. Ajo u tha gazetarëve se beson se rizgjedhja e nipit të saj u rizgjodh pasi ai ka kapacitetin të dojë të tjerët. Dhe ashtu siç do gjyshe do të kërkonte nga nipi i saj, ajo i kërkoi zotit Obama të bënte më të mirën.