Mijëra demonstrues kanë dalur rrugëve të Shkupit për të protestuar kundër vendimit të presidentit të vendit Gjorgje Ivanov me të cilin falen të gjithë politikanët e dyshuar për raste kriminale. Protesta e thirrur nga Lidhja Social Demokrate e opozitës u nis nga ndërtesa e Prokurorisë së Posaçme, për të vazhduar para zyrave ndihmëse të presidentit maqedonas ku u hodhën vezë, gurë e mjete piroteknike. Më pas, protestuesit e çanë kordonin e policisë dhe shkuan para parlamentit të vendit. megjithatë, protestuesit nuk arritën të shkojnë para selisë së partisë VMRO-DPMNE, në pushtet.
Nga ana tjetër, një tjetër grup kundër-protesuesish siç njihen në Maqedoni, u drejtua kah selia e Lidhjes Social Demokrate për të shprehur revilt kundër drejtuesve opozitarë.
Protestat që ka gjasa të kalojnë në dhunë, ndodhin në një kohë kur Maqedonia është përfshirë në krizë politike dhe e ka vështirë të gjejë një zgjidhje. Autoritetet nuk lejuan realizimin e të gjitha reformave që burojnë nga marrëveshja politike ndërmjet katër partive më të mëdha të arritur me ndihmën e komunitetit ndërkombëtar, verën e kaluar. Ndërsa, data e zgjedhjeve e planifiuar për më 5 qershor, ka thelluar edhe më shumë përplasjet midis pushtetit dhe opozitës. LSD maqedonase këmbëngulë që me çdo lushte të shtyhet data për shkak të kushteve të papërmbushura, por partitë e pushtetit , deri tash janë treguar se nuk heqin dorë nga kjo datë.
Presidenti maqedonas Gjorgje Ivanov me vendimin e djeshëm për faljen e politikanëve ka nxitur mjaft reagime në vend por dhe protesta të opozitës. Në listën e të falurve ndodhen emrat e Nikolla Gruevskit, ish-kryeministër, të ish-ministrave të Rendit dhe Transportit, ish-drejtori i shërbimit sekret, por dhe Zoran Zaev i opozitës dhe një sërë emrash të tjerë të politikës. Komuniteti ndërkombëtar, ndërkohë, e shikon vendimin si një minim të sundimit të ligjit në vend dhe pengesë e zgjedhjeve të besueshme.
Your browser doesn’t support HTML5
Maqedoni, Reagime per faljen e politikaneve