Shtetet e Bashkuara po e dënojnë me forcë përjashtimin e Tajvanit nga Asambleja Botërore e Shëndetit (ABSH), organi vendimmarrës i Organizatës Botërore të Shëndetit (OBSH).
ABSH filloi takimin e saj vjetor të hënën, i cili u zhvillua praktikisht për herë të parë për shkak të pandemisë COVID-19. Tajvani tha se nuk kishte marrë ftesë për të marrë pjesë si vëzhgues përkundër përpjekjeve të forta dhe "një niveli të lartë të mbështetjes ndërkombëtare".
Lexoni edhe këtë Kina mbron qasjen e saj ndaj pandemisë
Sekretari i Shtetit Mike Pompeo kritikoi përjashtimin e Tajvanit në një deklaratë, duke thënë se Drejtori i Përgjithshëm i OBSH-së Tedros Adhanom Ghebreyesus kishte "çdo fuqi ligjore dhe precedent" për të përfshirë Tajvanin, por nuk e bëri këtë, nën presionin e Kinës.
"Mungesa e pavarësisë së Drejtorit të Përgjithshëm privon ekspertizën e njohur shkencore të Tajvanit mbi sëmundjen pandemike, dhe dëmton më tej besueshmërinë dhe efektivitetin e OBSH në një kohë kur bota ka nevojë më së shumë se kurrë," tha të hënën Sekretari i Shtetit i Sh.B.A-së, Mike Pompeo.
Dënimi vjen në një kohë kur Sh.B.A po pezullon fondet për OBSH-në dhe po kërkon reformimin e agjencisë.
Sh.B.A pretendon se OBSH-ja dështoi në "misionin e saj thelbësor" të shkëmbimit të informacionit dhe "detyrën kryesore" të saj për të hetuar rastet e hershme të koronavirusit. Uashingtoni gjithashtu ka tërhequr vëmendjen në atë që thotë se është ndikimi i tepruar i Kinës në OBSH në mes të pandemisë COVID-19.
Zyrtarë të lartë amerikanë kanë thënë se lloji i reformave që Uashingtoni dëshiron që OBSH-ja të miratojë duhet të përfshijë mbështetjen e pjesëmarrjes së Tajvanit.
"Status kuoja është e patolerueshme. OBSH duhet të ndryshojë dhe duhet të bëhet shumë më transparente dhe shumë më e përgjegjshme, "tha Sekretari amerikan i Shëndetësisë dhe Shërbimeve Njerëzore Alex Azar në fjalën e tij në asamble të hënën.
"Është gjithashtu kritike që Tajvani të marrë pjesë si vëzhgues në ABSH, për të sjellë këndvështrimin e dobishëm në lidhje me përgjigjen e tyre të efektshme dhe shembullore," shtoi Azar. "OBSH-ja e ndaloi Tajvanin nga pjesëmarrja në vitin 2016 vetëm disa muaj pas zgjedhjeve të lira dhe të ndershme të Tajvanit. Shëndeti i 23 milion njerëzve tajvanezë nuk duhet të sakrifikohet kurrë për të dërguar një mesazh politik. "
Tajvani ka arritur një nga përpjekjet më të suksesshme në botë për tu kundërpërgjigjur pandemisë deri më sot, pavarësisht afërsisë së tij me vendin e origjinës në Uhan të Kinës.
Ministri i Jashtëm i Tajvanit Joseph Wu shprehu "keqardhje të thellë dhe pakënaqësi të fortë që kreu i Organizatës Botërore të Shëndetësisë i është nënshtruar presionit nga qeveria kineze dhe vazhdon të mosrespektojë të drejtën për shëndetin e 23 milion njerëzve të Tajvanit."
Në një letër të përbashkët drejtuar drejtorit të përgjithshëm të OBSH-së, SH.B.A., Kanadaja, Japonia, Britania, Franca, Gjermania, Australia dhe Zelanda e Re thanë se përjashtimi i Tajvanit nga OBSH-ja ka krijuar një shqetësim serioz për shëndetin publik gjatë krizës COVID-19.
Delegatët nga Tajvani kishin marrë pjesë në Asamblenë Botërore të Shëndetit si vëzhgues pa vota nga viti 2009 deri në vitin 2016. Kina që nga ajo kohë bllokoi përfaqësimin e Tajvanit në këtë ngjarje pas zgjedhjes së Tsai Ing-wen, një skeptike e Kinës, si presidente eTajvanit në vitin 2016 dhe ajo fitoi rizgjedhjen në vitin 2020.
Kina pretendon sovranitetin mbi Tajvanin, por Tsai kundërshton kushtet e qeverisë së Pekinit për dialog. Të dy palët janë qeverisur veçmas që nga vitet 1940.