Ish-guvernatori i Masaçusetsit Mit Romni deklaroi dje se do të kërkojë të marrë emërimin e republikanëve si kandidat për president. Biznesmeni multimilioner e filloi fushatën e tij në shtetin Nju Hempshër me një sulm të ashpër kundër presidentit Obama. Kandidati republikan synon t’i tregojë partisë së tij se është shansi më i mirë i republikanëve për të mundur zotin Obama:
Mitt Romney e filloi fushatën e tij në një fermë në Nju Hempshër, një ndër shtetet ku zhvillohen zgjedhjet e hershme partiake për republikanët.
Në fjalimin e tij, kandidati republikan kritikoi politikat e deritanishme të presidentit demokrat:
"Barack Obama e ka lënë në baltë Amerikën”.
Analistët thonë se zoti Romni duhet të bindë bazën republikane se është kandidati më i fortë për të mundur zotin Obama, i cili aktualisht është përpara në anketa krahasuar me kandidatët republikanë.
Zoti Romni kritikoi politikën e jashtme të Presidentit Obama. Ai tha se presidenti kishte hezituar në përkrahjen e protestuesve demokratë në Iran dhe protestuesve në botën arabe. Ai tha se Presidenti Obama po vepronte si udhëheqësit evropianë që fajësojnë Izraelin për konfliktin me palestinezët.
Por zoti Romni u përqendrua kryesisht në mënyrën se si presidenti ka reaguar ndaj problemeve ekonomike, duke e fajësuar zotin Obama për papunësinë dhe shpenzimet e mëdha federale.
"Kur erdhi në Shtëpinë e Bardhë, ekonomia ishte në krizë. Ai e bëri më keq. Dhe e zgjati krizën shumë më tepër”.
Kjo është hera e dytë që zoti Romni konkuron për president dhe ai e ka provuar veten në drejtim të grumbullimit të fondeve.
Por në vitin 2008, kur humbi emërimin e partisë së tij si kandidati republikan për zgjedhjet e 2008, përballë senatorit Xhon Mekein, ai pati përballë një numër sfidash elektorale.
Një prej tyre ishte përpjekja për t’u distancuar nga qëndrimi i tij i mëparshëm ndaj abortit, martesës mes homoseksualëve dhe kujdesit shëndetësor kur ishte guvernator i shtetit liberal të Masaçusetsit.
Një tjetër ishte fakti që ai i përket besimit Mormon. Megjithëse ky besim u themelua në Amerikë, shumë votues evangjelistë me pikëpamje konservatore e shohin besimin mormon me dyshim si rezultat i mospërputhjeve teologjike.
Din Debnam i Agjencisë për Anketime mbi Politikat Shtetërore në Karolinën e Veriut thotë se këto çështje mund të dalin përsëri në sipërfaqe bazuar në kandidatët që do ta sfidojnë zotin Romni për emërimin e Partisë Republikane:
"Por nëse nuk del ndonjë kandidat i fortë, atëherë republikanët do të tregohen besnikë dhe do ta mbështesin zotin Romni duke mos përfillur ato gjëra që i konsiderojnë si probleme morale”.
Ish guvernatorja e Alaskës Sara Pejlin ishte po ashtu në shtetin Nju Hempshër në kuadër të një turneu që ka bërë bujë të dukshme.
Kandidatë të tjerë republikanë përfshijnë ish-Kryetarin e Dhomës së Përfaqësuesve Njut Gingriç, ligjvënësin nga Teksasi Ron Pol dhe guvernatorin e Minesotës Tim Polenti.