Shkencëtarët rusë Andre Geim dhe Konstantin Novoselov janë fituesit e çmimit Nobel në fizikë për këtë vit. Ata u nderuan për eksperimente me një lloj karboni të fortë dhe me përçueshmëri të lartë që është transparent, i hollë sa një atom.
Akademia Mbretërore Suedeze e Shkencave, e cila jep çmimin për fizikën, tha se materiali i ri mund të përdoret për të bërë shpikje të reja elektronike.
Sipas Akademisë, forma e re e karbonit, është e përshtatshme për të bërë ekrane të tejdukshme që funksionojnë me prekje dhe panele dritash, dhe mund të përzihet me lëndë plastike për të përçuar energjinë elektrike pa u nxehur shumë.
36-vjeçari Konstantin Novoselov kishte punuar fillimisht me Andre 51-vjeçarin Geim si student doktorature në Holandë. Të dy ata janë tani profesorë në Universitetin e Mançesterit.
Çmimi përfshin një shpërblim prej 1,5 milionë dollarësh dhe një medalje ari.
Këtë javë pritet të shpallen çmimet Nobel për kiminë, letërsinë dhe paqen.