Sekretarja amerikane e Shtetit Hillary Clinton po vazhdon sot turneun e saj në Gjirin Persik me një ndalesë në Jemen, ku ajo theksoi se Shtetet e Bashkuara janë të përkushtuara të bashkëpuojnë me Jemenin për të luftuar terrorizmin.
Zonja Clinton u takua me Presidentin Ali Abdullah Saleh në kryeqytetin Sanaa të Jemenit. Ajo është e para sekretare amerikane shteti që viziton Jemenin në 20 vjet.
Agjencia e lajmeve SABA e Jemenit tha se të dy udhëheqësit diskutuan për çështje mes të cilave kundërterrorizmin, zhvillimin ekonomik dhe mbështetjen e demokracisë në Jemen.
Sipas agjencisë, zonja Clinton i dha zotit Saleh edhe një letër nga Presidenti Barak Obama, që e fton udhëheqësin e Jemenit të vitizojë Shtetet e Bashkuara.
Pas takimit me presidentin jemenas Ali Abdullah Saleh, zonja Clinton tha se SHBA dhe Jemeni përballen me një kërcënim të përbashkët, atë të Al-Kaidës dhe militantëve të tjerë. Zonja Clinton tha se SHBA po ashtu janë të përkushtuara për t’ i dhënë ndihmë ekonomike Jemenit.