OSBE u bëri sot thirrje institucioneve dhe shoqërisë shqiptare që të kujdesen më shumë për fëmijët e varfër, të cilët rrezikohen për trafikime kriminale dhe shfrytëzim të formave nga më të ndyrshmet. OSBE po mbështet një projekt që i largon ata nga rruga dhe lypsaria dhe i afron me programet e shkollimit dhe të zhvillimit kulturor.
Your browser doesn’t support HTML5
OSBE për mbrojtjen e fëmijëve
Zëvendës-kryetari i Pranisë së OSBE-së në Shqipëri, Robert Uilton, thotë se mbrojtja e fëmijëve është detyrë themelore për të gjithë. Ai theksoi me shqetësim se sipas raportit të fundit të UNICEF-it dhe organizatës “Save the Children”, mbi 2 mijë e 500 fëmijë shqiptarë jetojnë në kushtet e rrugës. Ndërsa sipas Instatit, rreth 5 për qind e fëmijëve në Shqipëri shfrytëzohen për punë.
Zoti Uilton tha se bizneset private nuk duhet të punësojnë fëmijë, po ashtu edhe prindërit e tyre. Shkeljet ligjore tha ai, janë më të rënda kur ato shkelin të drejtat e fëmijëve, ndaj institucionet nevojitet të bashkëpunojnë më fort dhe ti ndihmojnë fëmijët edhe me mbështetjen e OSBE-së dhe bashkësisë ndërkombëtare.
Zëvendës-ministrja e punëve të brendshme Elona Gjebrea tha se qeveria ka ngritur dhe zgjeruar komitetin shtetëror kundër trafikimi të qenieve njerëzore, me pjestarë nga disa ministri, sepse kjo nuk është punë vetëm e policisë. Zonja Gjebrea tha se në këtë detyrë të vështirë nevojitet ndihmesa e gjithë institucioneve dhe qytetarëve, sapo dyshojnë për një trafik apo shfrytëzim ndaj fëmijëve. Madje Shqipëria i ka në punë të gjitha programet elektronike për të lehtësuar këtë mbrojtje.
Projekti i ri ka marrë në mborjtje 50 fëmijë të rrezikuar. Agjencia për mbrojtjen e të drejtave të fëmijëve dhe Shërbimi Social Shtetëror kanë ngritur grupe me polisë dhe psikologë për t'u qëndruar afër familjeve të varfëra dhe fëmijëve që punësohen për të shitur apo lypur.