Ardit Ferizi, shtetas i Kosovës, pranoi të mërkurën fajësinë në një gjykatë amerikane për akuzat se i ka dhënë mbështetje materiale organizatës terroriste Shteti Islamik dhe ka hyrë pa autorizim në një kompjuter të mbrojtur, nga i cili ka marrë informacion.
Your browser doesn’t support HTML5
Ardit Ferizi pranon fajësinë për bashkëpunim me ISIS
"Ferizi pranoi se ka vjedhur të dhëna personale të mbi 1.000 ushtarakëve dhe punonjësve federalë amerikanë, duke ia kaluar ato ISIS-it për të nxitur sulme terroriste kundër këtyre individëve," tha ndihmës Prokurori i Përgjithshëm John Carlin, pas seancës që u zhvillua sot në Alexandria të shtetit Virginia pranë Uashingtonit.
20-vjeçari Ferizi u arrestua nga policia në Malajzi në tetor të vitit të kaluar në bazë të një urdhër arresti të lëshuar nga autoritetet amerikane. Ai u soll në SHBA dhe në janar të këtij viti u përball me akuzat.
Prokurorët federal thanë se ai kishte përdorur emrin e koduar "Th3Dir3ctorY" dhe kishte drejtuar një grup hakerësh të njohur si “The Kosova Hacker's Security”.
Në muajin gusht, një pjesëtar i Shtetit Islamik me emrin Junaid Hussain, postoi në rrjetin social twitter një mesazh që pëmbante në vete një lidhje me një dokument më të gjatë. Në mesazh thuhej: “ne jemi në postat tuaja elektronike dhe sistemet kompjuterike, duke parë dhe duke regjistruar çdo lëvizje tuajën. I kemi emrat dhe adresat tuaja... Ne po nxjerrim të dhënat tuaja të besueshme dhe po ua japim informacionet ushtarëve të Kalifatit, të cilët së shpejti me lejen e Allahut do të godasin kokat tuaja në tokat tuaja”.
Rasti kundër Ferizi është i pari i këtij lloji.
Në seancën e dënimit që është caktuar për në 16 shtator të këtij viti, Ferizi përballet me një dënim maksimal prej 20 vjet burg për mbështetje materiale për ISIS-in dhe pesë vjet për hyrje pa autorizim në një kompjuter të mbrojtur për të marrë informacionin.