Udhëheqësit e Bankës Qendrore të Kosovës e përshkruan me tone jo shumë të këndshme rrjedhën e zhvillimeve ekonomike në vitin 2012. Gjatë prezantimit të raportit vjetor për vitin 2011 dhe të dhënave për periudhën e parë të këtij viti, kryetari i këshillit drejtues të Bankës Qendrore, Gazmend Luboteni, tha se në vitin 2011, me gjithë krizën e rëndë në eurozonë, Kosova ka arritur të ruajë qëndrueshmërinë e saj me një rritje ekonomike prej 5 për qind, ndërsa parashikimet për vitin 2012 thonë se ajo do të jetë 3.8 për qind.
http://www.youtube.com/embed/sIlSMuy6HuI
“Përsëri vazhdojnë ato trendet negative, në radhë të parë importet shumë të larta dhe eksportet të cilat për fat të keq janë duke u zvogëluar dhe sidomos në fillim të këtij viti dhe dërgesat e imigrantëve të cilat kanë shënuar trend pozitiv gjatë vitit 2011, mirëpo në periudhën gjashtëmujore të këtij viti kemi pasur trende negative dhe rënie mjaft të madhe edhe të eksporteve e dërgesave por edhe të investimeve të huaja direkte që janë jashtëzakonisht të rëndësishme për ekonominë e Kosovës dhe për fuqizimin e ekonomisë së saj”.
Zoti Luboteni tha se edhe tregu i punës është një nga problemet e rënda të Kosovës.
“Edhe një problem tjetër që ka mbetur ende prezent dhe vazhdon të jetë përkundër normës pozitive të rritjes ekonomike është niveli i lartë i papunësisë që e ka Kosova. 45 për qind është vlerësimi që është shumë i lartë dhe një nga arsyet kryesore është për shkaka të moshës së re popullsisë së Kosovës dhe rritjes së kontigjentit të punës për çdo vit, që natyrisht ekonomia e Kosovës me këto kapacitete që ka nuk mund të absorboj aq lehtë”, tha ai.
Për Guvernatorin e Bankës Qendrore, Gani Gërguri, ndër sfidat kryesore është dallimi i thellë ndërmjet eksporteve dhe importeve të Kosovës.
“Deficiti i lartë tregtar mbetet sfida kryesore për ekonominë e vendit tonë, aq më tepër kur dihet se ky deficit është kryesisht i udhëhequr nga importi i mallrave, në të njëjtën kohë kjo sfidë është edhe kërcënim por edhe mundësi për ta marrë si pikënisje për fillimin e ri - dizajnimit të modelit të rritjes ekonomike të vendit tonë”, tha zoti Gërguri
Për ta ndryshuar gjendjen aktuale, Kosovës i duhet një rritje ekonomike prej mbi 7 për qind. Trendi i investimeve në Kosovë dhe zhvillimet në botë, vështirë se mund të sigurojnë edhe për një kohë rritje të tillë, ndërsa studimet e Bankës Botërore parashikojnë një rritje të ngadalshme të ekonomive të vendeve të Evropës Juglindore.