Ambasadori amerikan në Prishtinë, Philip Kosnett, kritikoi të mërkurën projektligjin për mbrojtjen e vlerave të luftës së Ushtrisë Çlirimtare të Kosovës, duke e cilësuar atë si “mënyrë të gabuar për të shprehur respektin për UÇK-në”.
Projektligji për mbrojtjen e vlerave të luftës së Ushtrisë Çlirimtare të Kosovës, një nismë e Partisë Demokratike mbështetur nga qeveria e Kosovës më 14 korrik, është dërguar në kryesinë e parlamentit dhe së shpejti mund të hidhet para deputetëve për votim.
“Ky ligj kriminalizon fjalën e lirë, frikëson qytetarët si dhe është i kushtueshëm. Shpërqendro përpjekjet praktike për ta kuptuar dhe mësuar historinë e Kosovës”, tha ambasadori Kosnett në një postim në rrjetet sociale.
The proposed KLA Values Law is the wrong way to show respect for KLA. It criminalizes free speech, intimidates citizens, and is costly. It distracts from practical efforts to understand and teach Kosovo’s history. When will parties refocus energies on the economy and COVID-19? pic.twitter.com/SgXKJvJQ9X
— Ambassador Philip S. Kosnett (@USAmbKosovo) July 29, 2020
Nëse projektligji miratohet në parlamentin e Kosovës, zbatimi i tij do të kushtonte rreth 2 milionë e 250 mijë euro.
Projektligji parasheh përcaktimin e detyrimit institucional dhe qytetar për mbrojtjen e vlerave të luftës së UÇK-së. Vlerë e luftës, sipas këtij projektligji konsiderohet lufta e armatosur e popullit të Kosovës e udhëhequr nga UÇK-ja, vetë UÇK-ja si formacion ushtarak i armatosur, veterani i UÇK-së, flamuri, betimi i ushtarit, stema, shtabi i përgjithshëm, drejtoria politike, shtabet e zonave operative, arkiva, si dhe kompleksi përkujtimor “Adem Jashari” në Prekaz dhe komplekset tjera.