Kryeministri rus Dmitry Medvedev ka paraqitur dorëheqjen e kabinetit të tij, menjëherë pasi Presidenti Vladimir Putin propozoi një seri ndryshimesh kushtetuese që synojnë forcimin e parlamentit në kurriz të presidencës.
Propozimi i Putinit erdhi gjatë fjalimit të tij të përvitshëm në Asamblenë Federale në Moskë të mërkurën - një fjalim vjetor i stilit "mbi gjendjen e vendit", i cili u duk se parashtori hapat për të ruajtur ndikimin e Putinit mbi vendin kur mandati i tij aktual dhe i fundit presidencial të përfundojë në 2024-ën.
Sipas agjencive ruse të lajmeve, Putini më vonë emëroi Shefin e Shërbimit të Taksave Mikhail Mishustin si kryeministrin e ri të vendit.
Miratimi i kryeministrit dhe posteve të tjera kyçe të kabinetit, sugjeruar nga Putini në fjalimin e tij të mërkurën, së shpejti duhet të dërgohet pranë organit legjislativ të Dumës. Putini gjithashtu propozoi që Këshilli i Shtetit, aktualisht një grup këshillues i presidentit, të ketë me kushtetutë autoritet zyrtar.
"Këto janë ndryshime shumë serioze në sistemin politik", tha Putini në përshkrimin e propozimeve.
Disa orë pas fjalimit, Medvedev lëshoi një deklaratë.
"Në këtë kontekst, është e qartë që ne, si qeveri e Federatës Ruse, në këto kushte duhet t'i japim presidentit të vendit tonë mundësinë të marrë të gjitha vendimet e nevojshme", tha ai.
Rusia përtej Putinit
Ndryshimi i Kushtetutës dhe riorganizimi i qeverisë janë kapitulli i fundit në spekulimet e shumta mbi të ardhmen e Putinit, kur mandati i tij aktual dhe i fundit të përfundojë në 2024.
Ndryshimet kushtetuese për të ndaluar kufijtë e mandatit dhe një bashkim të mundshëm me Bjellorusinë fqinje janë ndër teoritë që janë debatuar gjerësisht si zgjidhje gjysmë ligjore për ta mbajtur Putinin në fuqi.
Sidoqoftë, me fjalimin e së mërkurës që sugjeron ndryshimin e presidencës, Putini dukej se la të kuptohej se po merrte pushtetin përmes një arkitekture të re kushtetuese - ndoshta si një kryeministër i sapo autorizuar ose anëtar i një këshilli të pavarur të sigurisë.
"Të gjithë po hamendësojnë: çfarë do të bëjë ky regjim hajdut për të qëndruar në pushtet pas vitit 2024," shkroi në Twitter një satirë politike, Мысли Перзидент.
Все гадали, что придумает воровской режим, чтобы удержать власть после 2024 года. А вот что. https://t.co/u8DJ4VRLXo
— Мысли Перзидента (@VVP2_0) January 15, 2020
Në të vërtetë, një reformë e veçantë, e propozuar nga Putini - që kushdo që kandidon për president duhet të jetojë në Rusi për të paktën 25 vjet - sugjeron se lideri rus kishte vëmendje ndaj konkurrentëve të mundshëm për vendin e Kremlinit në 2024.
Biznesmeni rus Mikhail Khodorkovsky, një oligark i dikurshëm dhe rival i Putinit i cili aktualisht jeton në mërgim, kishte thënë se ai ishte i hapur për të kandiduar për këtë post.
Ndryshimi - pasi të miratohet - në dukje do ta ndalonte atë nga zgjedhjet.