Të mërkurën qeveria e Kosovës tha se është përmbyllur procesi i gërmimeve në Kizhevak të Rashkës, në Serbinë jugperëndimore, ku janë zbuluar trupa të shqiptarëve të vrarë gjatë luftës së viteve 1998-1999.
Në një njoftim të qeverisë thuhet se “në bazë të ekzaminimit antropologjik është konstatuar se numri minimal i individëve të zhvarrosur është nëntë, prej të cilëve dy janë të identifikuar, përmes metodës së ADN-së, në fazën e parë të procesit të zhvarrimit”.
Gërmimet filluan më 30 nëntor të vitit të kaluar pak ditë pasi që hetuesit mjeko-ligjorë duke përdorur pamje satelitore, thanë se ka gjurmë të trupave në një minierë të hapur në Kizhevak.
Lexoni edhe këtë Gërmimet në një varrezë të dyshuar masive në SerbiDimri ndërpreu gërmimet që rifilluan më 5 maj të këtij viti.
Kizhevaku nuk është shumë larg minierës së Rudnicës në Serbi, ku në vitin 2013 u gjet një varrezë masive me eshtrat e 52 shqiptarëve të Kosovës.
Kryesuesi i delegacionit të Kosovës për bisedimet mbi çështjen e të zhdukurve gjatë luftës, Ibrahim Makolli, tha se “ka një numër varrezash të dyshuara në Serbi që ne besojmë se do të trajtohen në muajt dhe javët e ardhshme”. Ai tha se “sipas zyrtarëve serbë, ka dyshime për 16 varreza masive. Kjo është varreza e peste dhe kërkojmë përgjigje për 11 vende të tjera ku mund të ketë trupa të të vrarëve”, tha ai.
Lexoni edhe këtë Kosovë: Krimet e luftës dhe mosndëshkimi i tyreKosova doli nga lufta që mori fund me ndërhyrjen e NATO-s, me mbi 10 mijë të vrarë dhe mbi 5 mijë të zhdukur. Një pjesë e madhe e trupave u gjetën në varreza masive ne Serbi ku ishin dërguar nga forcat serbe në përpjekje për të fshehur gjurmët e mizorive të tyre.
Varreza më e madhe është zbuluar në vitin 2001, në Batajnicë afër Beogradit, ku në terrenet e stërvitjeve të forcave të posaçme serbe u gjetën trupat e rreth 800 shqiptarëve të Kosovës.
Edhe 22 vjet pas luftës, në Kosovë ende nuk dihet asgjë për fatin e mbi një mijë e 600 personave të zhdukur, pjesa më e madhe e tyre të përkatësisë kombëtare shqiptare.