Dhjetra të rinj shqiptarë protestuan sot qetësisht para shtatores së car Dushanit të vendosur para pak ditësh në sheshin kryesor të Shkupit.
Protestuesit u përpoqën ta mbulojnë me pëlhurë të zezë shtatoren e carit serb të Mesjetës, të cilin shqiptarët e njohin si pushtues të tokave të tyre, por nuk u lejuan nga policia. Ndërkohë, mbrëmë persona të panjohur në përpjekje për rrënimin e shtatores mëse një-tonëshe, arritën të dëmtojnë vetëm disa pjesë të saj.
Your browser doesn’t support HTML5
Shtatorja e Car Dushanit në Shkup
Askush nga autoritetet nuk pranon të ketë dhënë lejen për ngritjen e shtatores. Për këtë, partitë shqiptare në Maqedoni fajësojnë njëra-tjetrën. Shqiptarët e konsiderojnë ngritjen e saj si një provokim të rëndë të qeverisë maqedonase dhe kërkojnë që shtatorja të hiqet sa më shpejt nga ura që lidh dy anët e lumit Vardar pranë sheshit të Shkupit.
Shqiptarët në kryeqytetin e Maqedonisë përbëjnë të paktën njëzet përqind të popullatës, sipas regjistrimit të vitit 2002.
