Live Blog: SHBA, Obama fiton zgjedhjet

Votimet e sotme janë një sfidë për banorët e New Yorkut dhe New Jerseyt, ku qindra mijëra banorë po përpiqen të rimëkëmben nga superstuhia Sandy.

Të dyja qeveritë lokale të këtyre shteteve kanë marrë masa për të ndihmuar banorët e zhvendosur nga stuhia, psh duke i lejuar ata të votojnë jo në qendrat e votimit që i ishin paracaktuar, por në qendra të reja. New Jersey po i lejon njerëzit të votojnë me e-mail, ose me faks, por këto metoda nuk duket se do t’i ndihmojnë të votojnë njerëzit që janë ende në pritje të rikthimit të energjisë elektrike.

Qyteti i New Yorkut ka vënë në dispozicion të votuesve autobuzë të posaçëm, me synimin për t’i ndihmuar banorët të shkojnë të votojnë, ndërsa disa distrikte të New Jerseyt kanë shpërndarë fletë votimi të posaçme për strehimet e krijuara për stuhinë.

Korrespondentja e Zërit të Amerikës Margaret Besheer thotë se disa votues nga New Yorku kanë shprehur shqetësim se pjesëmarrja në votime mund të jetë më e ulët se normalisht, për shkak të stuhisë. Një pjesë e viktimave të stuhisë thonë se kanë probleme të shumta dhe se këtë vit nuk u mbetet kohë për të votuar.

Të dy kandidatët presidencialë kanë çuar ekipe të tëra juristësh për të vëzhguar për parregullsi të mundshme. Departamenti i Drejtësisë ka çuar rreth 800 vëshgues në qendrat e votimit në 23 shtete, për t’iu përgjigjur çdo akuze të mundshme për manipulim votash.

Votuesit në Shtetet e Bashkuara po hedhin votën e tyre për të rizgjedhur Presidentin Barack Obama ose për të zgjedhur rivalin republikan Mitt Romney si udhëheqësin e vendit për 4 vjetët e ardhshëm.

Votuesit pritën në radhë në gjithë vendin për të vendosur fituesin e zgjedhjeve presidenciale, që sipas anketave është vështirë për t’u parashikuar.

John Fortier, ekspert në Qendrën Ndërpartiake të Politikave, thotë se pjesëmarrja varet nga entuziazmi, bazat e ekonomisë dhe se si ndjehen njerzit rreth gjendjes së vendit.

“Përpjekja e fundit për pjesëmarrje në zgjedhje është me të vërtetë organizatë e kandidatëve dhe partive. Ata po bëjnë të gjitha përpjekjet për identifikimin e votuesve dhe nxjerrjen e tyre në votime”.

Patrick Burns priti një orë për të votuar në shtetin e Virxhinias.

“Është gjë e madhe. Virxhinia do të jetë një prej shteteve që do të vendosin rezultatin e zgjedhjeve dhe ndjehem mirë që votoj në një shtet të lëkundur”.

Rezultati i zgjedhjeve presidenciale nuk vendoset nga votat popullore, por nga i ashtuquajturi sistem i Kolegjit Zgjedhor. Rëndësia e secilit shtet për rezultatin e zgjedhjeve është gati i barabartë me popullsinë e tij.

Ndërsa anketat e opinionit në shkallë kombëtare janë shumë të ngushta, anketat shtet më shtet i japin presidentit Obama një epërsi të vogël në një numër shtetesh të pavendosura, të cilat ka të ngjarë të përcaktojnë rezultatin.

Larry Sabato, drejtor i Qendrës së Politikave në Universitetin e Virxhinias, thotë se rezultati i anketave kombëtare nuk ka rëndësi.

“Ajo që ka rëndësi janë votimet në 9 prej 50 shteteve. Këto 9 shtete janë ato që ne i quajmë shtete të lëkundura, sepse anketat flasin për një garë shumë të ngushtë, dhe pikërisht aty do të vendoset edhe rezultati i zgjedhjeve”.

Si Presidenti Obama edhe zoti Romney bënë fushatë deri dje vonë në shtete të rëndësishme për të cilat kanë nevojë të fitojnë.
Pas një përpjekjeje 6 vjeçare për Shtëpinë e Bardhë, zoti Romney i cilësoi zgjedhjet si një moment ripërtëritjeje dhe optimizmi.

“Ne kemi udhëtuar së bashku për një kohë të gjatë dhe kudo në vend në këtë fushatë të madhe për të ardhmen e Amerikës dhe tani jemi afër fitores”.

President Obama bëri ndalesën e fundit të fushatës dje vonë në Ajova, një shtet tjetër i lëkundur.

“Kur cinikët thanë se ne nuk mund të fitonim, ne thamë, 'po, ne mund të fitojmë”.

Bashkë me presidentin, amerikanët votojnë sot edhe për të 435 anëtyarët e Dhomës së Përfaqësuesve dhe për 33 anëtarë të Senatit me 100 anëtarë.
Shumica e analistëve parashikojnë se republikanët do të vazhdojnë të kenë shumicën në Dhomën e Përfaqësuesve, ndërsa Partia Demokrate ka të ngjarë të ruajë një shumicë të vogël në Senat.

Rezultatet e para kanë filluar të shpallen dhe deri tani ish-guvernatori i Masaçusetsit Mitt Romney ka fituar në tre shtete: Kentaki, Indiana dhe Virxhinian Perëndimore, ndërsa Presidenti Barack Obama në shtetin e Vermontit. Përsa u takon votave elektorale, gjithsej zoti Romney ka deri tani 24 vota elektorale, ndërsa zoti Obama 3.