BE, Shqipëria -- raporti i progresit

Ndërsa pritet raporti i progresit i Komisionit Europian mbi ecurinë e Shqipërise në plotësimin e 12 rekomandimeve për të marrë statusin e kandidatit, analistë të pavarur shfaqin një optimizëm të matur lidhur me vlerësimet. Lëvizja Europiane e Shqipërisë është një qendër që studion hap pas hapi përmbushjen e këtyre rekomandimeve. Drejtuesi i saj, Gledis Gjipali, thotë se disa prej tyre janë plotësuar dhe disa janë trajtuar pjesërisht, por edhe disa nuk janë prekur fare. Kjo e bën të vështirë një vlerësim të qartë të situatës, të cilën mund ta sqarojë vetëm raporti në tetor.