Lidhje

Qipro, zyrtarët diskutojnë masat e shpëtimit


Banka Qendrore Evropiane paralajmëroi se do t'i ndërpresë Qipros financimet e emergjencës nëse deri të hënën nuk bihet dakord për një plan të ri

Zyrtarët qipriotë u takuan përsëri sot për të dalë me një plan të ri që do të çonte në grumbullimin e 7.5 miliard dollarëve për të shmangur mospagimin e borxhit. Para dy ditësh ligjvënësit hodhën poshtë një propozim për taksimin e depozitave bankare të qytetarëve në masën deri në 10 përqind.

Grumbullimi i kësaj shume është i domosdoshëm për të siguruar financimin nga ana e Bashkimit Evropian për të shmangur falimentimin.

Banka Qendrore Evropiane paralajmëroi sot se do t'i ndërpresë Qipros financimet e emergjencës nëse deri të hënën nuk bihet dakord për një plan të ri. Bankat vazhdojnë të qëndrojnë të mbyllura këtë javë për të mos lejuar që klientët e përfshirë nga paniku të tërheqin paratë.

Krerët e partive politike të vendit u takuan sot me presidentin Nikos Anastasiadhes për të diskutuar mënyrën se si mund të shmanget falimentimi. Bankat e Qipros kanë para deri të hënën nëqoftëse nuk hartohet një plan për zgjidhjen e situatës.

Ndërkaq në Bruksel, kreu i ministrave të financave të Eurozonës deklaroi se çdo propozim i ri që Qiproja të marrë kredi shpëtimi duhet të përfshijë taksimin e depozitave bankare. Ai tha se barra e kësaj takse duhet të rëndojë mbi depozitat me më shumë se 100 mijë euro dhe se kjo taksë është e pashmangshme, po të kihet parasysh se sektori financiar i vendit është i mbingarkuar me kredi të këqia.

Rreth një e treta e depozitave bankare të Qipros u takojnë investitorëve rusë.

Kryeministri rus, Dmitri Medvedev, tha se plani i propozuar nga Eurogrupi është absolutisht absurd. Ai i bëri komentet sot në Moskë në një konferencë mbi marrëdhëniet mes Rusisë dhe Bashkimit Evropian.

"Ne mendojmë se skema e propozuar është e paparashikueshme," tha zoti Medvedev.

Por Presidenti i Komisionit Evropian, Jose Manuel Barroso tha se i kuptonte shqetësimet e Rusisë dhe ishte gati t'i diskutonte ato.

"Ky vendim ishte rrjedhojë e një kompromisi mes vendeve të Eurogrupit. Por unë jam i hapur të dëgjoj shqetësimet e homologëve tanë rusë," tha zoti Barroso.

Ekonomia e Qipros zë një përqindje fare të vogël në ekonominë e Eurozonës. Disa analistë shqetësohen se taksimi i depozitave në Qipro mund të krijojë një precedent të rrezikshëm duke bërë që edhe investitorët në vendet me borxhe të mëdha të Eurozonës të tërheqin paratë nga bankat.
XS
SM
MD
LG