Në Kosovë asnjëra nga partitë politike nuk ka shprehur vullnet për të ndryshuar qëndrimet që e kanë lënë vendin pa institucione të reja që nga tetë qershori, kur u mbajtën zgjedhjet parlamentare. As përpjekjet e presidentes së Kosovës Atifete Jahjaga për të lehtësuar dialogun politik nuk kanë dhënë ende ndonjë rezultat dhe kjo ka bërë që të diskutohet mundësia që, në mungesë të një zgjidhjeje, vendi të shkojë në zgjedhje të reja. Por, kjo mundësi u kundërshtua sot nga një pjesë e partive politike, që pretendojnë se kanë shumicën në parlamentin e Kosovës.
