Lidhje

NASA, zgjedhja e astronautëve


Për shumë vetë që aspirojnë të bëhen eksplorues të botës, të qenit astronaut është një ëndërr e fëmijërisë. Kohët e fundit, një numër rekord njerëzish, 18 mijë e 300 vetë, aplikuan për t'u pranuar në programin e NASA-s "Kandidat për Astronaut" për vitin 2017.

Në një periudhë prej 18 muajsh, NASA do të zgjedhë 8-14 aplikantë, për një klasë të re astronautësh. Shanset për t'u zgjedhur janë të vogla, më pak se 0.08 për qind, që e bën përfshirjen në këtë program 65 herë më të vështirë se sa pranimi në Universitetin Harvard, ku shanset e pranimit janë 5.2 për qind. Çfarë vetish nevojiten për t'u zgjedhur astronaut i NASA-s? Korrespondentet e Zërit të Amerikës Peggy Chang dhe Shan Xu shkuan tek Qendra e Hapësirës Johnson e Hjustonit, ku u njohën me procesin e përzgjedhjes së astronautëve:

A ju ka shkuar ndonjëherë në mend se si mund të bëhesh astronaut i NASA-s? Fillon me plotësimin e një formulari. Agjencia amerikane e Hapësirës mori më tepër se 18 mijë kërkesa kur njoftoi vitin e kaluar se po kërkonte një klasë të re astrouanutësh. Menaxherja e zgjedhjeve, Anne Roemer, thotë se ky proces nuk ishte diçka e lehtë.

“Është shumë e vështirë; gjithshka e bëjmë me shumë kujdes. Fillon me shqyrtimin e të gjitha dokumentave, për t'u siguruar që aplikantët kanë kualifikimin bazë dhe pastaj i kërkojmë ekipit të tanishëm të astronautëve që ta studjojnë dokumentacionin," - thotë ajo.

Aplikantët duhet të jenë shtetas amerikanë dhe të jenë diplomuar në inxhinieri, biologji, fizikë, shkenca kompjuterike, ose matematikë.

Ata duhet të kenë gjithashtu një ekperiencë prej të paktën tre vjetësh, ose të paktën 1 mijë orë si pilot avioni. Përveçse të qënit të aftë fizikisht, bazuar tek disa analiza mjekësore, NASA kërkon që aplikantët e saj të kenë disa tipare të veçanta të karakterit.

“Duhet të kenë disa veçori, si aftësinë për rol udhëheqës, për të punuar në grup, për të qenë pjesë e një ekipi: drejtues i tij, ose një anëtar i thjeshtë. Aftësia e komunikimit sigurisht që luan rol, pra kërkohen disa aftësi të zakonshme, që mendoj se janë të nevojshme edhe për profesionistë të tjerë."

Për raundin e parë të intervistave në Qendrën e Hapësirës Johnson të Hjustonit, do të ftohen rreth 120 aplikantë. Gjysma e tyre do të thirren për një intervistë të dytë. Me t'u zgjedhur, astronautët duhet të plotësojnë me sukses një periudhë dy-vjeçare trajnimi...

“... ku ata të marrin disa njohuri të përgjithshme për fluturimin në hapësirë, si trajnim për sistemet, mësimin e rusishtes dhe të praktikojnë EVA, termi për ecjet në hapësirë. Pra ata bëjnë pak nga të gjitha për një periudhë dy-vjeçare, para se të caktohen të shkojnë në stërvitjen një misioni specifik."

Ky grup astronautësh mund të fluturojë në tre anije hapësire të reja të NASA-s që janë duke ndërtuar, siç është Orioni, me synim eksplorimin e hapësirës në thellësi. Në se gjithshka shkon mirë, NASA ka në plan të dërgojë njerëz në Mars rreth vitit 2030.

Për ata që janë të interesuar të kenë karrierë në hapësirë, Anne Roemer, menaxherja për pranimet, thotë:

“Këshilla që u japim gjithmonë të rinjve që janë të interesuar, është që të zgjedhin një karrierë që u pëlqen dhe që e kanë pasion, sepse ekziston prirja për të qenë i suksesshëm në një profesion që të pëlqen; të qenit astronaut është një arritje e madhe, kulmi i një karriere të sukseseshme."

Që nga viti 1959, kur u zgjodhën 7 astronautët e parë nga radhët e ushtrisë aemrikane, NASA ka zgjedhur vetëm 338 të tjerë.

XS
SM
MD
LG