Sekretari amerikan i Shtetit John Kerry, tha se Uashingtoni dhe Pekini do të marrin masa për zbatimin e plotë të sanksioneve të reja, më të ashpra, ndaj Koresë së Veriut.
Shtetet e Bashkuara dhe Kina janë kundër zotërimit të armëve bërthamore nga Koreja e Veriut, u tha zoti Kerry gazetarëve në përfundim të takimit të përvitshëm strategjik Kino-Amerikan.
Sanksionet e reja kundër Koresë së Veriut u vendosën në fillim të vitit nga OKB-ja, në përgjigje të provës së katërt bërthamore të këtij vendi. Kina, aleati kryesor i Koresë së Veriut, i mbështeti sanksionet.
Por ndërsa për Korenë e Veriut, Kina dhe Shtetet e Bashkuara kanë të njejtin qendrim, ato kanë mosmarrëveshje përsa i përket pretendimeve territoriale të Kinës në Detin e Kinës Jugore.
Sekretari Kerry u bëri thirrje gjithë vendeve me pretendime territoriale në këtë zonë, t’i zgjidhin mosmarrëveshjet përmes diplomacisë. Sasia e tregëtisë, që kalon përmes Detit të Kinës Jugore është 5 trilionë dollarë në vit. Në këtë rajon, po ashtu mendohet të ketë rezerva të mëdha nafte dhe gazi natyror.
