Autoritetet në Pakistan bënë të ditur se një bombë e fuqishme që shpërtheu sot shkaktoi 22 të vrarë dhe më shumë se 50 të plagosur.
Shpërthimi në Paraçinar, qendra administrative e distriktit gjysëm autonom të Kurramit, ndodhi pranë hyrjes së një xhamie shiite që përdorët vetëm nga gratë besimtare.
Nuk është e qartë nëse makina bombë u telekomandua apo ishte akt i një sulmi vetëvrasës. Deri tani askush nuk ka marrë përsipër përgjegjësinë për këtë sulm.
Si pasojë e shpërthimit shumë persona janë plagosur rëndë dhe kjo ka shtuar frikën se numri i të vdekurve mund të rritet. Ushtria dërgoi në vendgjarje helikopterë për evakuimin e shpejtë të viktimave.
Kryeministri Nawaz Sharif dënoi sulmin dhe përsëriti vendosmërinë e palëkundur të Pakistanit për të asgjesuar terrorizmin.
'' Rrjeti i terroristëve tashmë është thyer dhe është detyra jonë kombëtare për të vazhduar këtë luftë deri në asgjësimin e plotë të terrorizmit" thuhet në deklaratën zyrtare të kryeministrit Sharif.
Qyteti i Paraçinarit u godit edhe në muajin janar nga një shpërthim vetëvrasës që shkaktoi 23 persona të vrarë dhe më shumë se 50 të plagosur.
Facebook Forum