Lidhje

Kosovë, vazhdojnë thirrjet për miratimin e marrëveshjes me Malin e Zi


Autoritetet ndërkombëtare në Kosovë vazhduan edhe të martën t'u bëjnë thirrje partive politike në parlament për të ratifikuar marrëveshjen për shënimin e kufirit me Malin e Zi, si një hap për t’i hapur rrugën Kosovës drejt integrimeve evropiane.

Parlamenti i Kosovës pritet të mblidhet të mërkurën, pasi që dy herë me radhë gjatë javës së kaluar dështoi të arrijë pajtim për të miratuar marrëveshjen me Malin e Zi. Tashmë pajtimi është arritur ndërmjet partive në pushtet dhe Lidhjes Demokratike të Kosovës në opozitë për të ratifikuar marrëveshjen për shënimin e kufirit, por ende mbetet i paqartë sigurimi i votave pasi që të gjitha këto parti nuk sigurojnë dot dy të tretat e votave në parlamentin 120 vendesh.

Kosovë, vazhdojnë thirrjet për miratimin e marrëveshjes me Malin e Zi
please wait

No media source currently available

0:00 0:03:15 0:00

Lëvizja Vetëvendosje vazhdon të kundërshtojë marrëveshjen, ndërsa Lista Serbe ka bojkotuar edhe diskutimet rreth saj.

Kryetari i parlamentit të Kosovës Kadri Veseli u takua sot me ambasadorin amerikan në Prishtinë Greg Delawie për të diskutuar këtë cështje dhe sipas një komunikate të dy kanë theksuar se është koha e fundit që Kosova ta ratifikojë marrëveshjen, për t’i zënë afatet e nevojshme për heqjen e vizave gjatë këtij viti.

Edhe shefja e zyrës së Bashkimit Evropian në Kosovë, Natalya Apostolova pas takimit me kryetarin e parlamentit u bëri thirrje deputetëve që të mendojnë për të ardhmen e qytetarëve dhe të rinjve të Kosovës. Ajo tha se gjatë javëve të fundit ka pasur zhvillime të rëndësishme të cilat i kanë hapur rrugë ratifikimit të marrëveshjes.

“Dua të them se jemi pothuajse aty, prandaj është shumë e rëndësishme që ratifikimi i marrëveshjes për shënimin e kufirit të ndodhë nesër dhe kjo duhet të ndodhë patjetër. Ratifikimi i marrëveshjes do të jetë hap shumë i rëndësishëm drejt liberalizimit të vizave për Kosovën”, tha ajo duke nënvizuar se partitë politike nuk duhet të lëshojnë këtë rast.

Kryetari i Parlamentit të Kosovës Kadri Veseli shfaqi bindjen se marrëveshja do të ratifikohet.

“Kosova dhe qytetarët e vet kanë nevojë për një lajm të mirë dhe presin një të tillë dhe ne do ta sjellim këtë lajm të mirë nesër, jam i sigurt duke e votuar marrëveshjen për shënimin e kufirit. Ratifikimi i marrëveshjes ditën e nesërme shënon forcimin e sovranitetit të shtetit tonë të pavarur dhe sovran, jep sinjal për perspektivën tonë perëndimore drejt BE-së dhe në të njëjtën kohë presim nga vendet e Bashkimit Evropian që të na ndihmojnë në rrugëtimin tonë drejt kësaj familjeje të madhe”, tha zoti Veseli.

Marrëveshja për kufirin me Malin e Zi, kishte ndarë skenën politike në vend për gati tre vjet. Seanca e jashëtzakonshme për votimin e saj mbahet të mërkruën pak orë para vizitës së presidentit të Komisionit Evropian, Jean-Claude Juncker, i cili po viziton të gjashtë vendet e Ballkanit Perëndimorë, në dritën e strategjisë së re për zgjerim të Bashkimit Evropian.

Mos ratifikimi i kësaj marrëveshjeje që është kusht për liberalizimin e vizave ka bërë që qytetarët e Kosovës ende të presin në radhë për viza para ambasadave evropiane ndërsa është edhe një nga kushtet që Kosova duhet përmbushë drejt rrugës së saj drejt integrimeve evropiane.

Facebook Forum

XS
SM
MD
LG