Gjashtëdhjetë e tre për qind e punonjësve amerikanë janë të stresuar dhe të gatshëm të lënë punën, dhe komunikimi i dobët është shkaku kryesor i zhgënjimit të tyre, sipas një sondazhi të kompanisë Dynamic Signal. Kjo kompani me seli në Kaliforni merret me shitjen e platformave të komunikimit celular.
Tetëdhjetë për qind e punonjësve amerikanë thonë se kanë nivel të lartë stresi për shkak të komunikimit joefektiv të kompanisë, që është një rritje prej 30 për qind nga një vit më parë.
Sondazhi përfshiu 1,001 të anketuar të cilët iu përgjigjen pyetjeve në internet mes 31 janarit dhe 12 shkurtit.
Ndër më të pakënaqurit janë 80 milionë punonjësit që paguhen me orë, të cilët rrallë kanë qasje në një email pune. Këta janë punonjës që nuk punojnë në zyrë, por në vende si dyqanet e shitjes me pakicë, hotele, restorante, bare, objekte prodhimi, depo dhe spitalet, si dhe në fushën e transportimit të mallrave.
Ata që nuk punojnë në zyrë katër herë më shumë kanë gjasa të pranojnë se kompania e tyre komunikon në mënyrë më efektive me punonjësit e zyrës sesa me ta.
"Unë mendoj se kompanitë po bëjnë të njëjtën punë që kanë bërë përgjithmonë, por pritshmëritë e punonjësve të tyre kanë evoluar", thotë Russ Fradin, Drejtor Ekzekutiv i kompanisë Dynamic Signal. "Sepse kur është fjala për llogarinë bankare, statusin në Tinder ose rezultatet e ndeshjeve sportive, do që ta dish menjëherë se ç'po ndodh menjëherë e jo një orë, tre ditë ose tre javë më vonë. Mendoj së kjo shton shumë pakënaqësinë".
Përveç kësaj, studimi arriti në përfundimin se punonjësit shpenzojnë deri në dy orë çdo javë pune duke kërkuar informacionie për të kryer detyrat e tyre të përditshme.
Studime të tjera gjithashtu pasqyrojnë pakënaqësinë në rritje me komunikimet e brendshme në vendet e punës. Një sondazh i vitit 2017 nga kompania Gallup zbuloi se vetëm 13 për qind e punëdhënësve gjetën se komunikimet e kompanisë së tyre ishin efektive.
Dhe Staffbase, një kompani tjetër që prodhon aplikacione celulare për komunikimet e brendshëm të punonjësve, thotë se 74 për qind e punonjësve të SHBA mendojnë se ata "nuk marrin njoftimet dhe informacionet e kompanisë".
Përdorimi i posterëve në dhomën e pushimit, në linjat e prodhimit, në gazetat dhe revistat e kompanisë për të komunikuar me punonjësit mund të kenë qenë efektive para ardhjes së telefonave inteligjentë. Por tani që shumica e amerikanëve, 77 për qind, kanë telefona inteligjentë, kompanitë si ajo e zotit Fradin, si dhe Harvard Business Review, po bëjnë thirrje për përdorimin e aplikacioneve celulare për të përmirësuar komunikimin mes punonjësve.
Kjo do t'u mundësonte punonjësve të marrin informacion rreth orareve, rrogave, dhe njoftimeve të kompanive drejtpërdrejt në celularë, edhe nëse ata nuk kanë një email të kompanisë.
"Është e rëndësishme që edhe kompanitë të shfrytëzojnë aftësitë e celularëve që përdoren në jetën e përditshme nga punonjësit e tyre", thotë zoti Fradin. "Ekziston një mënyrë që njerëzit e përdorinn për të marrë të gjithë informacionin e tyre dhe punëdhënësit nuk kanë mbajtur hapin me këtë."
Përmirësimi i komunikimit të brendshëm mund të rrisë efekthsmërinë. Kompanitë me angazhim më të lartë të punonjësve mbajnë më shumë punëtorë dhe sjellin fitime më të larta, sipas raportit të vitit 2017 nga kompania Gallup mbi vendet e punës në Amerikë.
Facebook Forum