Presidenti i Ukrainës Volodymyr Zelenskiy njoftoi se kishte zhvilluar një bisedë urgjente telefonike me homologun e tij rus Vladimir Putin, pas vrasjes së katër ushtarëve ukrainas në lindje të vendit.
Gjatë një konference për shtyp në Kiev zoti Zelenskiy tha se i kishte thënë zotit Putin se “ngjarje të tilla nuk i shërbejnë paqes". Ai i kishte bërë thirrje atij që t’u kërkonte separatistëve të mbështetur nga Moska "të ndalnin vrasjen e ukrainasve".
Presidenti i Ukrahinës tha se presidenti rus i kishte premtuar diçka, detaje të së cilës do të bëheshin publike më vonë.
Kremlini nuk ka bërë komente rreth bisedës telefonike mes dy homologëve.
Në një deklaratë më 6 gusht të ministrisë së Mbrojtjes së Ukrainës thuhej se separatistët kishin hapur zjarr gjatë asaj dite ndaj postblloqeve të Ukrainës që ndodhen në rajonin e Donetsk-ut, duke përdorur granata-hedhëse, mitralozë dhe armë sulmi.
Ky është numri më të lartë i viktimave të shënuar brenda një dite në konfliktin e Ukrainës që prej një armëpushimi të arritur rreth tre javë më parë.
Më shumë se 13,000 njerëz janë vrarë në konflikt prej prillit të 2014-s.
Një marrëveshje armëpushimi në vitin 2015 mes Rusisë dhe Ukrainës, e ndërmjetësuar nga Franca dhe Gjermania, i dha fund konfliktit të madh në lindje të Ukrainës, megjithatë përleshje të rregullta të një shkalle më të vogël vazhdojnë të marrin jetë njerëzish.
Facebook Forum