Një organizatë kundër duhanpirjes në Liban mblodhi për 20 muaj gati 240 mijë bishta cigaresh në zonën përqark një kampusi universitar. Këto bishta cigaresh u përdorën për të krijuar një objekt në ndihmë të pastrimit të plazheve të Bejrutit.
Një syprinë tre metra e gjatë, 10 centimetra e trashë dhe me peshë vetëm 12 kilogramë po ndihmon për të mbledhur mbeturinat nga deti.
“Jemi duke bërë një pastrim të detit mbi këtë objekt të krijuar nga bishtat e cigareve”, thotë Joslin Kehdi, themeluese e organizatës “Recycle Lebanon”.
Për gati një vit e gjysëm, aktivistët mblodhën rreth një çerek milioni bishta cigaresh rrotull kampusit të Universitetit Amerikan të Bejrutit.
“Kjo është një mënyrë për ta zgjuar publikun. Në këtë dërrasë gjenden rreth 12 mijë bishta cigaresh. I kemi mbledhur së bashku me Universitetin Amerikan të Bejrutit”, thotë zonja Kehdi.
Universiteti thotë se kjo iniciativë vendase po mobilizon burimet për të mirën e përbashkët, duke shndërruar materialet e hedhura në diçka të vlefshme.
“Anët janë të mbështjella me tapë natyrale dhe rrëshirë të prodhuar nga materiale ekologjike... Rëndësia e kësaj lundre është se do të përdoret për të pastruar brigjet. Pra, e prodhuam nga ato çfarë hidhen në det, për të pastruar detin”, thotë Mona Hallak, e iniciativës së Universitetit Amerikan të Bejrutit.
Një dërrasë lundrimi mund të jetë vetëm fillimi.
“Është e rëndësishme të vazhdojmë me dizenjimin e gjërave të tjera. Nuk do ta zgjidhim dot këtë krizë globale thjesht duke ricikluar produkte, por duhe ndalur origjinën e mbeturinave”, thotë zonja Kehdi.
Aktivistët po u bëjnë thirrje kompanive të cigareve të mos përdorin më plastikën për prodhimin e filtrave. Libani radhitet në vendin e tretë në botë për konsumimin e cigares në raport me popullsinë, rreth 12 paketa në muaj, ose 3 mijë cigare për person në vit.
Facebook Forum