Në Shqipëri, prokurori i ri i përgjithshëm organizoi një konferencë mbi reformën në sistemin e drejtësisë me prokurorë dhe mbështetësit e saj ndërkombëtarë.
Pas ndërtimit të institucioneve të reja të drejtësisë, pohuan diplomatët amerikanë dhe europianë, tani priten më shumë rezultate në luftën ndaj krimit të organizuar dhe korrupsionit.
Ambasadorja e SHBA-ve n Shqipëri, Yuri Kim, u bëri sot thirrje institucioneve të reja të drejtësisë shqiptare që të ndërtojnë bashkëpunimin për të çuar përpara drejtësinë shqiptare.
Ajo i bëri këto komente në konferencën mbi sfidat e prokurorit të përgjithshëm në vazhdën e reformimit të sistemit gjyqësor.
“Ngritja e Zyrës Speciale të Prokurorisë dhe Byrosë Kombëtare të Hetimeve është një hap themelor dhe shumë i rëndësishëm drejt funksionimit të SPAK për të zhvilluar hetimet kundër krimit të organizuar dhe korrupsionit. Si një anëtare e NATO-s dhe si kandidate për në BE, Shqipëria duhet të ndërtojë mbizotërimin e ligjit. Kjo nuk është një zgjedhje, kjo është një kërkesë, e cila duhet plotësuar. I duhet dhënë fund korrupsionit dhe pandëshkueshmërisë; këto janë pengesat që Shqipëria të bëhet më e mirë dhe ai magneti që duhet të jetë për të tërhequr investime” - tha ambasadorja e SHBA-ve në Shqipëri, Yuri Kim. Ajo siguroi prokurorinë shqiptare për mbështetjen amerikane në rrugën e forcimit të ligjit, ndërsa kërkoi një goditje më të forta ndaj korrupsionit.
Ndërsa ambasadori i BE-së, Luigi Soreca, tha se ngritja e institucioneve të reja të drejtësisë është vetëm fundi i fillimit të reformës shqiptare në sistemin e drejtësisë. Më pas pritshmëritë për rezultate në luftën ndaj krimit janë të larta tani që prokuroria është bërë më e paanshme dhe më profesionale, tha ai.
“Pak vite më parë prokurorët emëroheshin nga politika, ndërsa tani pas reformës gjyqësore prokurori i përgjithshëm u zgjodh me votim midis disa kandidatëve magjistratë, që konkurruan për këtë post. Ndërhyrjet politike janë përherë e më ulëta, ndërsa një numër juristësh të rinj i kanë hyrë karrirerës për këtë sistem. Efikasiteti duhet tani nga zyra e prokurorit e përgjithshëm në luftën kundër pastrimit të parasë, shtetëzimin e pasurive kriminale; këto duhet të përparojnë”, tha ambasadori Soreca.
BE është e gatshme të ndihmojë Shqipërinë me gjithçka me njerëz të kualifikuar dhe me fonde, siç ka bërë deri tani me 34 milionë euro për reformat e fushës së drejtësisë, tha ai.
Ambasadori i OSBE-së, Bernd Borchardt, tha se procesi i vetingut është vecanërisht një sukses me përzgjedhjen e më të mirëve mes shumë punonjësve të drejtësisë, pasuar nga ngritja e SPAK dhe BKH.
“Shqipëria është në rrugën e duhur të forcimit të ligjit dhe rregullit, të përmirësimit të cilësisë së demokracisë, dhe po ecën drejt integrimit europian” - tha ambasadori Borchardt.
Reforma në sistemin e drejtësisë dhe rezultatet konkrete në luftën ndaj krimit të organizuar janë ndër kërkesat kryesore të qytetarëve shqiptarë dhe institucioneve ndërkombëtare që vëzhgojnë ecurinë e Shqipërisë në rrugën e integrimit europian.
Facebook Forum