Sipas një studimi të ri global, vdekshmëria e foshnjeve të porsalindura, shtatzanitë ektopike dhe vdekjet e nënave gjatë lindjes u rritën gjatë pandemisë, ndoshta për shkak se gratë kishin më pak qasje tek shërbimet mjekësore.
Duke krahasuar rezultatet për gratë shtatzana në vitin 2020 me vitet e mëparshme, raporti vë në dukje se dëmi i shkaktuar nga COVID-19 ishte edhe më i theksuar në vendet më pak të zhvilluara. Hind Sherghin zbuloi se ishte shtatzënë gjatë pandemisë, si shumë gra të tjera verën e kaluar.
Sherghin, tashmë nëna e një vajze gjashtë vjeçare dhe një djali nëntë vjeçar, u gjend në të njëjtën situatë si shumë të tjerë që kishin nevojë për kujdes shëndetësor.
Ajo u sëmur rëndë në gusht dhe u diagnostikua me pneumoni. Por pas sëmundjes mjekët e testuan për antitrupa dhe rezultoi se ajo kishte kaluar COVID-19. Sherghin kaloi disa muaj e shqetësuar se virusi mund të kishte ndikuar në zhvillimin e foshnjes.
"Kur zbulova se kisha kaluar koronavirusin u trondita pasi ka kaq shumë të panjohura dhe ajo situatë më bëri shumë të stresuar gjatë gjithë shtatëzanisë pasi mendoja gjithçka", thotë Sherghin.
Pas disa analizash Sherghin u sigurua se fëmija i saj po zhvillohej normalisht, por fakti që COVID-19 ishte një virus i ri dhe dihej pak për ndikimin e tij tek gratë shtatzëna, apo foshnjet e tyre, ishte një shqetësim si për gratë ashtu edhe për mjekët që kujdeseshin për to.
Profesore Asma Khalil, obstetre në spitalin St. George në Londër bën pjesë në grupin e mjekëve që kanë studiuar ndikimin e virusit tek gratë dhe shtatzënitë e tyre.
"Kemi përfshirë më shumë se gjashtë milionë gra shtatzëna nga 40 studime në 17 vende dhe kemi krahasuar rezultatet e shtatzënisë së tyre gjatë pandemisë COVID-19 me periudhën para pandemisë," thotë mjekja Khalil.
Studimi zbuloi se numri i vdekjeve të foshnjeve gjatë lindjeve u rrit me gati një të tretën, dhe numri i grave që vdiqën gjatë shtatëzënësisë gjithashtu u rrit me gati një të tretën. Khalil thotë se vdekshmëria nuk ishte shkak i drejtpërdrejtë i infeksionit nga COVID-19, por dëmi i tij anësor.
Bllokimet në mbarë botën bënë që gratë të mos shkonin në spitale për kontroll. Problemet nuk mund të diktoheshin herët dhe të zgjidheshin me ndërhyrje të vogla, arritën në pikën ku duhej një ndërhyrje urgjente.
Bashkë-autorja e raportit, Profesorja Shakila Thangaratinam nga Universiteti i Birminghamit këshillon kujdes për shifrat. Ato janë të dhëna të periudhave para dhe gjatë pandemisë dhe jo një analizë e thellë.
"Numri është ende shumë i vogël dhe duhet të mbledhim më shumë informacione për të parë në se kjo llogaritje do të qëndrojë e njëjtë", thotë profesorja.
Sipas Laboratorit Global të të Dhënave të Ndryshimit në Universitetin e Oksfordit kishte pak më shumë se 140 milionë foshnje të lindura në vitin 2019, por vetëm një pjesë e vogël e grave që lindën kishin kaluar COVID-19.
Thangaratinam thotë se nuk ka dyshim që pandemia ka pasur një ndikim negativ në shëndetin e grave, por shton se duhet të bëhen shumë studime të tjera.
Si obstetre Khalil thotë se pyetja që i bëhet më shumë nga pacientet e saj është nëse duhet ta bëjnë vaksinën COVID-19 dhe nëse ajo mund të ndikojë në shëndetin e foshnjës.
"Është e vërtetë se nuk kemi të dhëna të shumta për sigurinë e vaksinës tek gratë shtatzëna dhe nëse ajo ka ndonjë efekt tek foshnja. Por dimë, veçanërisht nga të dhënat e CDC që ka pasur më shumë se njëzet mijë gra shtatzëna që kanë marrë vaksinën e COVID-it dhe deri më tani nuk ka patur probleme ", thotë Khalil.
"Rekomandimi, është që ne të shikojmë mundësinë e vaksinimit të grave nëse ato kanë rrezikun e infektimit të rëndë, për shembull nëse keni probleme mjekësore, nëse jeni mbipeshë, ose nëse keni rrezik të ekspozimit."
Ata që rrezikojnë më shumë nga ekspozimi janë punonjësit e kujdesit shëndetësor ose punonjësit socialë.
Facebook Forum