Parlamenti i Suedisë zgjodhi Magdalena Andersson si kryeministren e parë grua të vendit.
Ajo shërbente më parë në detyrën e ministres së Financave dhe në fillim të muajit nëntor u zgjodh kryetare e Partisë Socialdemokrate.
Zonja Andersson zëvendëson në të dy këto funksione, Stefan Lofven, i cili dha dorëheqjen më herët gjatë këtij viti.
Zgjedhja e zonjës Andersson në detyrën e kryeministres shënon një moment historik për vendin.
Prej dekadash Suedia është parë si një nga vendet më të përparuara të Evropës për sa i takon marrëdhënieve gjinore, por që ende nuk kishte zgjedhur një grua në postin e rëndësishëm politik.