Lidhje

Dhjetra të burgosur lufte ukrainas humbin jetën nga një goditje me raketë


Dhjetëra të burgosur lufte ukrainas dyshohet të jenë vrarë në një sulm me raketa të premten, ndërsa Moska dhe Kievi akuzojnë njëri-tjetrin për sulmin.

Ministria ruse e mbrojtjes tha se 40 të burgosur u vranë dhe 75 u plagosën në sulmin ndaj burgut në qytetin Olenivka, të kontrolluar nga separatistët pro-rusë, në rajonin e Donetskut.

Moska e akuzoi Kievin se e kishte goditur burgun me raketa HIMARS të prodhuara në SHBA, njoftuan agjencitë ruse të lajmeve.

Forcat e armatosura të Ukrainës mohuan autorësinë e sulmit dhe fajësuan forcat ruse për të, duke thënë se artileria ruse kishte vënë në shënjestër burgun.

"Në këtë mënyrë, pushtuesit rusë zbatuan qëllimet e tyre kriminale – për të akuzuar Ukrainën për kryerje e 'krimeve të luftës', si dhe për të fshehur torturat e të burgosurve dhe ekzekutimet," tha shtabi i përgjithshëm i Forcave të Armatosura të Ukrainës.

Ministria ruse e mbrojtjes tha se në burg strehoheshin të burgosur lufte ukrainas dhe se tetë punonjës të burgut u plagosën. Udhëheqësi separatist i mbështetur nga Rusia, Denis Pushilin, citohet të ketë thënë se nuk kishte asnjë të huaj në mesin e 193 personave të mbajtur atje.

Videoja e lëshuar nga korrespondenti rus i luftës, Andrei Rudenko, tregonte personelin ushtarak të mbështetur nga Rusia duke shqyrtuar rrënojat e djegura të atij që ai tha se ishte burgu.

Nga çatia e shembur e ndërtesës, mund të shiheshin mbetjet e trupave të djegur.

Trupat ukrainase u kapën rob pas luftimeve të ashpra për portin e Mariupolit në Detin Azov të Ukrainës. Ata ishin strehuar në fabrikën gjigante të çelikut Azovstal për muaj të tërë.

Regjimenti Azov dhe njësi të tjera ukrainase mbrojtën fabrikën e çelikut për gati tre muaj, duke u strehuar në tunelet e saj nëntokësore. Ata u dorëzuan në muajin maj nën sulmet e pamëshirshme ruse nga toka, deti dhe ajri.

Dhjetëra ushtarë ukrainas u dërguan më pas në burgje në zonat e kontrolluara nga Rusia si rajoni Donetsk, një zonë e shkëputur në Ukrainën lindore e cila drejtohet nga autoritetet separatiste të mbështetura nga Rusia.

XS
SM
MD
LG