Reaktori i fundit i aktivizuar në termocentralin e madh bërthamor të Zaporizhzhias u shkyç nga rrjeti i Ukrainës të hënën pasi bombardimet ruse ndërprenë linjat e energjisë, tha kompania shtetërore bërthamore “Energoatom”.
Impianti me gjashtë reaktorë që ndodhet në Ukrainën jugore, i cili është termocentrali më i madh bërthamor në Evropë, u pushtua nga Moska në mars, por ende operohet nga personeli ukrainas.
“Sot, si pasojë e një zjarri të shkaktuar nga bombardimet, linja e transmetimit (e fundit në funksion) u shkëput”, thuhet në një postim të kompanisë “Energoatom”, të postuar në rrjetin social Telegram.
"Si rezultat, njësia numër 6 e reaktorit, e cila aktualisht furnizon nevojat e centralit për energji, u shkyç nga rrjeti", thuhet në deklaratë.
Ukraina nuk është në gjendje të riparojë linjat e energjisë tani për shkak të rifillimit të luftimeve rreth stacionit, shkroi në Facebook ministri ukrainas i Energjisë, German Galushchenko.
"Riparimi i linjave të energjisë aktualisht është i pamundur - luftimet rreth termocentralit po vazhdojnë", tha ai.
Ministri Galushchenko u ankua se bombardimet e fundit goditën zonën menjëherë pasi shumica e inspektorëve të Agjencisë Ndërkombëtare të Energjisë Atomike u larguan nga centrali më herët të hënën.
“Sapo misioni i Agjencisë Ndërkombëtare të Energjisë Atomike u largua nga centrali bërthamor i Zaporizhzhias, reaktori sërish u shkyç”, shtoi ai.
Kievi dhe Moska kanë fajësuar njëri-tjetrin për rrezikim të një katastrofe bërthamore pasi zona rreth uzinës u bombarduan rregullisht gjatë muajit të kaluar.
Ukraina gjithashtu ka akuzuar vazhdimisht Rusinë për vendosjen e trupave dhe pajisjeve ushtarake në termocentralin bërthamor.
Dy reaktorë të termocentralit bërthamor, i pesti dhe i gjashti, mbeten në përdorim, por aktualisht janë shkyçur nga rrjeti. Ata janë shkyçur në mënyrë të vazhdueshme për shkak të bombardimeve në dy javët e fundit.