Presidenti rus Vladimir Putin njoftoi të mërkurën një mobilizim të pjesshëm në Rusi, pasi lufta në Ukrainë po mbush shtatë muaj dhe Moska humbet terren në fushën e betejës. Presidenti Putin gjithashtu paralajmëroi perëndimin se "nuk është blof" që Rusia do të përdorë të gjitha mjetet për të mbrojtur territorin e saj.
Fjalimi televiziv i udhëheqësit rus drejtuar kombit, vjen një ditë pasi rajonet e kontrolluara nga Rusia në Ukrainën lindore dhe jugore, njoftuan planet për të mbajtur referendume për t'u bërë pjesë e Rusisë. Përpjekjet e mbështetura nga Kremlini për të gëlltitur katër rajone mund të krijojnë rrethanat që Moska të përshkallëzojë luftën pas sukseseve të Ukrainës.
Presidenti Putin akuzoi Perëndimin për përfshirje në "shantazh bërthamor" dhe vuri në dukje "deklaratat e disa përfaqësuesve të rangut të lartë të shteteve kryesore të NATO-s për mundësinë e përdorimit të armëve bërthamore të shkatërrimit në masë kundër Rusisë".
“Atyre që i lejojnë vetes deklarata të tilla në lidhje me Rusinë, dua t'ju kujtoj se edhe vendi ynë ka mjete të ndryshme shkatërrimi ... dhe më moderne se ato të vendeve të NATO-s dhe kur kërcënohet tërësia tokësore e vendit tonë, për të mbrojtur Rusinë dhe popullin tonë, ne me siguri do të përdorim të gjitha mjetet që kemi në dispozicion”, tha presidenti Putin.
“Nuk është një blof”, shtoi ai.
Presidenti rus tha se ka nënshkruar një dekret për mobilizimin e pjesshëm, i cili do të hyjë në fuqi të mërkurën.
“Po flasim për mobilizim të pjesshëm, pra vetëm qytetarët që janë aktualisht në njësitë rezervë do t'i nënshtrohen rekrutimit dhe mbi të gjithë, ata që kanë shërbyer në forcat e armatosura dhe kanë një specializim të caktuar ushtarak dhe përvojë përkatëse”, tha ai.
Ministria ruse e Mbrojtjes tha se mobilizimi i pjesshëm do të përfshijë rreth 300 mijë trupa rezervë.
Referendumet, të cilat pritej të zhvillohen që në muajt e parë të luftës, do të fillojnë të premten në rajonet e Luhanskut, Khersonit dhe rajonet pjesërisht të kontrolluara nga Rusia të Zaporizhias dhe Donetskut.
Presidenti Putin tha se vendimi për mobilizimin e pjesshëm është i duhur “për kërcënimet me të cilat përballemi, përkatësisht për të mbrojtur atdheun tonë, sovranitetin dhe tërësinë tonë tokësore dhe për të garantuar sigurinë e popullit tonë dhe qytetarëve në territoret e çliruara”.
Më herët të mërkurën, presidenti ukrainas Volodymyr Zelenskyy, hodhi poshtë planet ruse për të organizuar referendume në rajonet e pushtuara në Ukrainën lindore dhe jugore dhe falënderoi aleatët e Ukrainës për dënimin e votimeve të planifikuara të fillojnë të premten.
Njoftimi i presidentit Putin nxiti reagime në shkallë të gjerë.
Ambasadorja amerikane në Kiev, Bridget A. Brink, shkroi se “referendumet e turpshme dhe mobilizimi janë shenja të dobësisë, të dështimit rus. Shtetet e Bashkuara kurrë nuk do ta njohin pretendimin e Rusisë për të aneksuar territorin e Ukrainës, dhe ne do të vazhdojmë të qëndrojmë me Ukrainën për aq kohë sa duhet”.
Mykhailo Podolyak, këshilltar i presidentit ukrainas, i tha agjencisë Reuters se ky është një veprim “absolutisht i parashikueshëm, i cili duket më shumë si një përpjekje për të justifikuar dështimin e tyre. Lufta qartazi nuk po shkon sipas skenarit të Rusisë dhe për këtë arsye Putini u detyrua të marrë vendime jashtëzakonisht jopopullore për të mobilizuar dhe kufizuar rëndë të drejtat e qytetarëve”.
Ministri britanik i Mbrojtjes, Ben Wallace tha se shkelja e premtimeve të tij për të mos mobilizuar pjesë të popullsisë së tij dhe aneksimi i paligjshëm i pjesëve të Ukrainës, janë një pranim se agresioni i tij po dështon. Asnjë sasi kërcënimesh dhe propagande nuk mund të fshehin faktin që Ukraina po e fiton këtë luftë, bashkësia ndërkombëtare është e bashkuar dhe Rusia po bëhet një e përjashtuar globale.
Zëvendëskancelari gjerman Robert Habeck tha se ky është "një hap tjetër i keq dhe i gabuar nga Rusia, të cilin natyrisht ne do ta diskutojmë dhe do të këshillohemi politikisht se si do t’i përgjigjemi”.
Lituania tha se ka shtuar shkallën e gatishmërisë ushtarake pas njoftimit të presidentit rus “për të parandaluar çfarëdo provokimi nga ana e Rusisë”.
Finlanda tha se trupat e saj janë të përgatitura dhe se “situata po ndiqet nga afër”.
*Mbështetur në agjencitë e lajmeve Associated Press dhe Reuters