Shkencëtarët më të njohur për klimën hapën një konferencë katërditore në Paris për t’i dhënë mbështetje një raporti për ndryshimet në klimën globale.
Komisioni Ndërqeveritar i OKB-së për Ndryshimin e Klimës pritet të nxjerrë të premten një nga katër raportet për ngrohjen globale. Në projektet paraprake paralajmërohet për ngritjen e nivelit të detit dhe ndryshime të skajshme të motit në dekadat e ardhshme. Sipas njoftimeve në dokument paralajmërohet gjithashtu se temperaturat globale mund të rriten me deri në 5.8 gradë celsius deri në fund të shekullit.
Vitin e kaluar, një ekip studimor amerikan tha se temperaturat globale po arrijnë në nivelin më të lartë që prej një milion vjetësh. Ekipi i Institutit Goddard të NASA-s për Studimet e Hapësirës tha se temperaturat globale janë rritur me 0.2 gradë në dekadë gjatë 30 vjetëve të fundit. Në një studim tjetër, Organizata Botërore e Meteorologjike tha se viti 2006 ishte i gjashtë më i nxehtë i regjistruar ndonjëherë.//lk