Zyrtarët afganë thanë se sulmet ajrore nga forcat ndërkombëtare kanë vrarë nëntë policë afganë në një përleshje gjatë së cilës palët e kishin identifikuar gabimisht njera-tjetrën si armike.
Zëvendës guvernatori i provincës Farah tha se luftimet filluan në distriktin e Anar Derah-it para agimit të së dielës. Ai tha se pas kësaj policët kishin hapur zjarr kundër trupave të koalicionit duke menduar se ato ishin forca talebane.
Zyrtari i qeverisë afgane tha se trupat e huaja kërkuan ndihmë nga ajri, dhe si pasojë e sulmit nga ajri u vranë nëntë policë dhe u plagosën të paktën katër të tjerë, duke përfshirë shefin e policisë së një distrikti.
Zyrtarë të koalicionit të NATO-s dhe Shteteve të Bashkuara thonë se po zhvillojnë hetime rreth incidentit. //bsa//