Kandidati demokrat për president Barak Obama dhe rivali i tij republikan Xhon Mekejn thonë se janë të gatshëm të sjellin ndryshim në politikën amerikane.
Në një intervistë dhënë rrjetit televiziv ABC, zoti Obama tha se ishte i gatshëm të bënte ndryshime të mëdha të cilat mund të mos pëlqehen shumë nga demokratët, si për shembull uljen e kostos e mbrojtjes së mjekëve nga paditë ligjore dhe rritjen e forcës ushtarake. Ai tha gjithashtu se lufta në Irak ishte mision jo i menduar mirë dhe pa një vizion të qartë për fitoren.Në një intervistë për rrjetin televiziv CBS, zoti Mekejn e prezantoi veten si forca e ndryshimit brenda Partisë Republikane që do t’i kundërvihet shpenzimeve të mëdha dhe do të mbështesë reformën për financimin e fushatave. Zoti Mekejn thotë se nëse fiton ai do t’i mirëpresë demokratët dhe politikanët e pavarur në administratën e tij në mënyrë që të rikthejë besimin tek qeveria.
Xhon Mekejn dhe kandidatja e tij për nënpresidente Sara Pejlin e
vazhduan fushatën e tyre pas kuvendit me një udhëtim në Kolorado. Ky ishte
takimi i parë i zotit Mekejn në Kolorado që kur demokratët mbajtën kuvendin e
tyre në kryeqytetin Denver muajin e kaluar.
“Xhon Mekejn e di se ne
kemi bërë ndryshime në Alaskë. Si guvernatore kam bërë punët politike dhe i kam
bërë ballë interesave të veçanta, lobistëve dhe kompanive të naftës.” - tha zonja Pejlin
Edhe zoti Mekejn foli rreth së njëjtës temë, duke shpresuar të ruante reputacionin e tij si jokonformist, i cili ka mbajtur qendrime që nuk janë përputhur gjithmonë me partinë e tij.
“Nëse doni reforma dhe ndryshim, atëherë ju duhen jokonformistë që nuk kanë frikë të thyejnë ca nga rregullat e zakonshme,”- tha zoti Mekejn.
Ndërkohë, kandidati
demokrat për president Barak Obama reagoi ndaj këtyre karakterizimeve duke
kritikuar për herë të parë Sara Pejlin, duke thënë se ajo thotë se kundërshton
shpenzimin e fondeve federale për projekte specifike shtetërore, në një kohë që
më parë i ka mbështetur ato.
Duke folur para 800
vetave të mbledhur në Terre Haute të Indianës, zoti Obama vuri në lojë
kundërshtarët e tij republikanë duke thënë se ata e prezantuan veten si njerëz
që do të sjellin ndryshim gjatë kuvendit republikan javën e kaluar.
“Mos ushqeni iluzione,” - i tha zoti Obama turmës që e rrethonte. “Partia e Xhon Mekejnit ka qenë në pushtet me ndihmën e tij. Unë e di se guvernatorja e Alaskës pretendon se ajo do të sjellë ndryshim. Ajo është politikane e zonja. Por, kur ke rënë dakort për ndarjen e fondeve të caktuara kur të ka interesuar dhe papritmas i kundërvihesh atyre, ky nuk është ndryshim. Fjalët duhet të mbështeten diku, nuk mund të shpikësh gjërat.”
Senatori Mekejn ka premtuar se do t’i zhdukë fondet e akurduara për
projekte specifike shtetërore, të cilat ligjvënësit i përfshijnë në ligjet e
shpenzimeve.
Si guvernatore, zonja
Pejlin fillimisht i kishte mbështetur këto lloj fondesh për një projekt të
debatueshëm në Alaskë të quajtur “ura që nuk të çon gjëkundi.” Por pastaj ajo e
tërhoqi mbështetjen për këtë projekt, pasi shtetit të saj, Alaskës iu kërkua të
mbulonte një pjesë të shpenzimeve. //mm//