Marrëdhëniet mes Shteteve të Bashkuara dhe Rusisë janë të tendosura për momentin lidhur me një numër çëshjesh, përfshirë zgjerimin e NATO-s, propozimin amerikan për vendosjen e një sistemi për mbrojtjen nga raketat në qendër të Evropës dhe sulmin rus kundër Gjeorgjisë në fillim të këtij viti.
Presidenti i zgjedhur, Barak
Obama, do të merret me këto çështje që ndajnë Uashingtonin dhe Moskën, kur të fillojë punën në janar. Rusia është duke mbajtur një qendrim sfidues
ndaj Uashingtonit, por duket e predispozuar për një takim të shpejtë me zotin
Obama.
Një ditë pas fitores historike të zotit Obama dhe festimeve nëpër botë, Presidenti rus, Dmitri Medvedev, mbajti një qendrim tjetër.
Në një fjalim të rëndësishëm, ai jo vetëm që nuk i kushtoi rëndësi fitores së
zotit Obama, por madje kërcënoi se do të vendoste raketa me rreze të shkurtër
veprimi në Kaliningrad, pranë Polonisë dhe Lituanisë, duke iu kundërvënë planit
amerikan për sistemin mbrojtës nga raketat në Evropën Qendrore. Uashingtoni
këmbëngul se sistemi ka si objektiv Iranin dhe jo Rusinë.
Rusia ka dërguar gjithashtu anije të marinës së saj në Hemisferën Perëndimore
për manovra të përbashkëta me Venezuelën, për një vizitë në Kubë dhe për
kalimin e një anieje luftarake në Kanalin e Panamasë.
Por me gjithë qendrimin sfidues ndaj Uashingtonit, Presidenti Medvedev duket se
pret me padurim të takohet me homologun e tij të ri amerikan.
“Mendoj se është shumë e rëndësishme mbajtja e këtij takimi dhe sa më parë që
të jetë e mundur. Dhe për këtë ne kemi
të njejtin mendim me presidentin e zgjedhur Obama, që takimi të zhvillohet pa
vonesë dhe pa parakushte”.
Zoti Obama mer presidencën në një kohë
kur Amerika është e angazhuar në dy luftëra dhe po kalon nëpër krizën më
të rëndë ekonomike që nga Depresioni i Madh në vitet 30-të.
Analisti i pavarur politik rus, Aleksander Konovalov, thotë se Rusia nuk ka të
ngjarë të jetë një nga përparësitë kryesore të Shteteve të Bashkuara.
"Mendoj se përparësistë e Obamës do të jenë në këtë radhë: ekonomia,
ekonomia dhe përsëri ekonomi, Iraku, Iraku dhe përsëri Iraku, si dhe
Afganistan, Afganistani dhe përsëri Afganistani. Pastaj ai do të ketë këhë të
mendojë dhe të bëjë diçka për Rusinë”.
Zoti Obama tha në fillim të dhjetorit se administata e tij do të bashkëpunojë
me Moskën kurdoherë që të jetë e mundur dhe përmendi si çështje mospërhapjen e
armëve bërthamore dhe përpjekjet e përbashkëta kundër terrorizmit. Por zoti
Obama i dërgoi edhe një mesazh të qartë Rusisë që të mos jetë prepotente në
raport me Gjeorgjinë dhe vendet e tjera fqinje të saj.
Por
Viktor Kremeniuk, zv/drejtor i Institutit Amerikano-Kanadez në Moskë,
thotë se Rusia dhe Shtetet e Bashkuara mund të bashkëpunojnë për shumë çështje
megjithë mosmarrëveshjet që kanë.
"Këto përfshijnë jo vetëm problemet
fianciare dhe mospërhapjen e armëve bërthamore, por edhe ndryshimet klimatike,
energjinë dhe një sërë çështjesh të tjera të komplikuara që duhen trajtuar
sëbashu”.
Presidenti i zgjedhur Obama, nuk ka folur me hollësi për politikën ndaj Rusisë,
duke thënë se Shtetet e Bashkuara kanë vetëm një President në çdo kohë. Megjithëse udhëheqësit e Kremlinit nuk morrën
pjesë në festimet ndërkombëtare për fitoren historike të zotit Obama, ata
presin që të jenë mes të parëve që do të takohen me të pas inagurimit. //iç//