Xhejms Berisha, piloti profesionist nga Kosova, i cili ka ndërmarrë një mision për të bërë të njohur pavarësinë e Kosovës në Amerikën Latine, thotë se deri tani ka vizituar me avionin e tij një numër vendesh latinoamerikane por ende nuk e ka realizuar objektivin që i kishte vënë vetes për shkak të kostos së lartë që ka patur një nismë e tillë.
Zoti Berisha ka udhëtuar deri tani në 13 vende dhe sapo është kthyer në SHBA, në përgatitje për të vazhduar fluturimin e tij për Kosovën. Xhejms Berisha ka lindur në fshatin Brestovc të Rahovecit, dhe prej 15 vjetësh jeton e punon si pilot profesionist në Shtetet e Bashkuara. Ai është pilot i linjave ajrore ndërkombëtare. Zoti Berisha ishte i ftuar për një intervistë në emisionin televiziv "Ditari".//lk