Presidenti i Shteteve të Bashkuara, Barak Obama, fitoi Çmimin Nobel të Paqes për vitin 2009, më pak se 9 muaj që kur erdhi në post. Korrespondenti i Zërit të Amerikës në Shtëpinë e Bardhë, Kent Klain na informon se edhe vetë administrata u kap në befasi nga ky lajm.
Zoti Obama tha se kjo ishte
surprizë për të dhe i ishte mirënjohës Komisionit norvegjez të Çmimit Nobel të
Paqes.
"Do të doja ta bëja të qartë se nuk e shikoj këtë si vlerësim të arritjeve
të mia, por si afirmim për udhëheqjen amerikane në emër të aspiratave të
popujve në të gjitha vendet".
Zoti Obama filloi detyrën vetëm 12 ditë para një shkurtit që është edhe afati i paraqitjes së propozimeve për këtë çmim. Disa vëzhgues të Nobelit thonë se ky ishte një çmim i parakohëshëm për të, pasi shumë nga përpjekjet diplomatike të zotit Obama kërkojnë ende kohë për të dhënë rezultate.
Presidenti tha se është i vetëdijshëm që çmimi ka qënë i papritur për shumë njerëz.
"Të them të drejtën, nuk mendoj se e mirtoj të jem në shoqërinë e kaq
shumë figurave transformuese, që janë nderuar më këtë çmim, burra dhe gra që më
kanë frymëzuar mua dhe gjithë botën me përpjekjet e tyre kurajoze në shërbim të
paqes. Por nga ana tjetër e kam të qartë
se ky çmim pasqyron botën në të cilën
këta burra dhe gra, si dhe gjithë amerikanët duan të ndërtojnë".
Kryetari i Komisonit të Çmimit Nobel të Paqes, Thorbjorn Jagland tha se
megjithatë, zoti Obama ka tërhequr vemendjen e botës dhe i ka dhënë popujve të
saj shpresë për një të ardhme më të mirë.
"Në se i hedh një vështrim historisë së Çmimit Nobel të Paqes, në shumë
raste ne janë përpjekur të vënë në pah
se çfarë po përpiqn të bëjnë shumë personalitete".
Komisioni i Nobelit vuri veçanërisht në dukje përpjekjet e Presidentit Obama
për të përmirësuar marrëdhëniet me myslimanët në botë dhe për një botë pa armë
bërthamore. Kryetari Jagland vlerësoi gjithashtu zotin Obama se ka "krijuar një klimë të re
në politikën ndërkombëtare", duke i vënë theksin diplomacisë shumëpalëshe.
"Diplomacia e tij është e rrënjosur në konceptin se ata që udhëheqin botën
duhet ta bëjnë këtë duke u mbështetur në vlerat dhe qendrimet e shumicës së
popullatës së botës".
Komisionet e Nobelit kanë zgjedhur vitet e fundit disa fitues që kanë
kundërshtuar politikën e jashtëme unilaterale të paraardhësit të zotit Obama,
ish presidentit George W. Bush.
Vendimi i komisionit të Nobelit, nuk u ka bërë ndonjë përshtypje të veçantë
kundërshtarëve të tij në politikën e brendëshme amerikane. Michael Steele, kryetar i Komitetit Kombëtar
Republikan, tha se "është për të ardhur keq që aftësia e presidentit për të
shkëlqyer ka lënë në hije mbrojtësit e palodhur të paqes që kanë arritur
rezultate reale për paqen dhe të drejtat e njeriut". Presidenti Obama njohu gjithashtu meritën e shumë njerëzve nëpër botë që
punojnë për paqen.
"Ky çmim nuk është thjesht për përpjekjet e administratës time. Ai është për përpjekjet kurajoze të popujve
në gjithë botën. Prandaj ky çmim duhet
të ndahet me këdo që përpiqet për drejtësi dhe dinjitet".
Presidenti Obama ishte mes 205 kandidatëve, numër rekord ky, për Çmimin Nobel të Paqes këtë vit. Ai
është presidenti i tretë amerikan në detyrë që merr Nobelin dhe i pari që kur
këtë çmim e mori Woodrow Wilsoni në vitin 1919.
Ende nuk ka ndonjë njoftim nëse Presidenti Obama do të shkojë në Oslo për të
marrë çmimin dhe se çfarë do të bëjë ai me shumën prej mbi një milionë dollarësh
që jepet këtë çmim. //iç//