Në Washington po vazhdon stuhia e dëborës, e cila mund të jetë më e madhja për kryeqytetin në muajin dhjetor që nga viti 1932. Deri sot pasdite pritet që bora të arrijë lartësinë 30 centimetra në verilindje. Metereologët thonë se lartësia e dërborës rreth Uashingtonit mund të arrijë 60 centimetra. Megjithëse e gjithë zona verilindore po mbulohet nga dëbora, zona e Uashingtonit pritet të jetë ndër më të prekurat. Shërbimi Metereologjik ka paralajmëruar që kushtet e rrugëve janë të rrezikshme për të udhëtuar me makinë.
Një stuhi e fuqishme që po përshkon brigjet e Atlantikut në Shtetet e Bashkuara, në fundjavën e fundit para Krishtlindjeve pothuajse ka bllokuar gjithë rajonin, ndërsa zyrtarët paralajmëruan për gjysmë metri borë dhe ndërprerje të energjisë elektrike.Njerëzit morën masa që një natë më parë duke blerë ushqime rezervë pasi Shërbimi Kombëtar Metereologjik nxorri paralajmërime për zonën nga Karolinat deri në Rod Ajlënd.
Në Virxhinia, guvernatori Tim Kein shpalli gjendjen e emergjencës para stuhisë, duke i vendosur në gadishmëri Gardën Kombëtare dhe agjencitë e tjera.
Edhe zyrtarët e Filadelfias shpallën gjendjen e emergjencës dhe të gjitha aktivitetet shkollore dhe jashtëshkollore u anulluan.
Guvernatori i Merilendit Martin O'Malli u bëri thirrje banorëve që nëse kanë mundësi të shmangin daljen nëpër rrugë.Disa persona po përpiqeshin që të përfundonin blerjet për festat e fundvitit para se të fillonte bora.
Agjencia ajrore United Airlines tha se kishte anuluar mbi 140 fluturime për sot për Brigjet Lindore.
Parashikimet ishin që sot pasdite trashësia e borës nga Washingtoni në Virginian Perëndimore të arrinte në 50 centimetra.
Metereologët thanë se kjo duket të jetë stuhia më masive e borës që nga shkurti 2003, kur bora arriti lartësinë 58 centimetra.
Në pjesë të Tenesisë, Karolinës së Veriut, Pensilvanisë dhe Nju Xhërsit bora pritej të arrinte lartësinë 30 centimetra.
Ekipet në Merilend, Delauerë, Nju Jork dhe Uashington DC po hidhnin kripë në autostradat kryesore për të parandaluar akumulimin e borës.
Disa universitete në Virxhinia dhe Merilend
anulluan provimet dhe aktivitetet e diplomimit. //kk//