Siria ka thirrur diplomatin kryesor amerikan në Damask për të protestuar kundër rregullave të reja të sigurisë amerikane, që përfshinë kontrollin e detyrueshëm të udhëtarëve nga 14 vende përfshirë Sirinë. Agjencia shtetërore siriane SANA njofton se ministri i Jashtëm sirian thirri sot diplomatin amerikan Chuck Hunter për t'i dorëzuar një notë proteste kundër masave që Siria i cilëson si jo miqësore dhe me standarte të dyfishta. Ministri i Jashtëm sirian kërkoi nga Shtetet e Bashkuara të rishqyrtojnë masën kundër Sirisë përndryshe Siria do të përgjigjet me masa të ngjashme. Shtetet e Bashkuara kanë urdhëruar kontroll të të rreptë ndaj shtetasve të vendeve që përbëjnë rrëzik për sigurinë, pas përpjekjes së dështuar për hedhjen në erë të një avioni amerikan ditën e Krishtlindjes. Shtetet e Bashkuara kanë akuzuar Sirinë për mbështetjen e grupeve militante islamike, si Hamasi dhe Hezbollahu, të cilat janë shpallur grupe terroriste nga Shtetet e Bashkuara.