Lidhje

FMN: Ekonomia globale duhet të rritet më tepër se sa niveli i parashikuar


Fondi Monetar Ndërkombëtar thotë se këtë vit, pas daljes nga recesioni, ekonomia globale ka mundësi të rritet me 4.2 përqind, më tepër se sa niveli i parashikuar më parë.

Ekspertët e FMN-së thonë se Kina do të jetë në krye të rigjallërimit ekonomik me një rritje të ndjeshme prej 10 për qind. Shtetet e Bashkuara do të kenë një rritje më të ngadaltë prej 3.1 përqind, por më të shpejtë se Evropa prej një përqind.

FMN-ja thotë se përpjekjet e qeverive për të nxitur ekonominë ishin të dobishme, por paralajmëron se rritja e deficitit mund të pengojë rritjen në të ardhmen. Autorët e raportit thonë se përpjekjet për stimulimin e ekonomisë që u bënë këtë vit duhet të vazhdojnë, por shumë vende duhet të shkurtojnë shpenzimet vitin e ardhshëm.

FMN-ja thotë se për të ruajtur ritmin e rritjes ekonomike botërore, është e nevojshme që vendet me deficit të lartë tregtar, siç janë Shtetet e Bashkuara, të shkurtojnë kërkesën, ndërsa vende si Kina, me suficit tregtar të nxisin kërkesën e brendëshme.

Fondi Monetar Ndërkombëtar po bën gjithashtu thirrje për rregulla më funksionale për financat, përfshirë kërkesën për bankat që të kenë rezerva më të mëdha monetare për të mbuluar investimet e pasuksesshme.

XS
SM
MD
LG