Mijëra tifozë futbolli valëvisnin flamuj japonezë në aeroportin Narita të Tokios sot, në shenjë mirëseardheje për ekipin e futbollit të femrave, të cilat u kthyen në atdhe mbasi fituan kupën e Botës në Futboll. Adhuruesit e futbollit brohorisnin teksa lojtaret dolën nga terminali duke mbajtur medaljet e arta që fituan mbas fitores së tyre ndaj Shteteve të Bashkuara në ndeshjen finale. Lojtaret japoneze befasuan botën e futbollit me fitoren e tyre me penallti ndaj ekipit të mirënjohur amerikan. Mes adhuruesve që pritën lojtaret japoneze ishte dhe kryeministri i vendit Naoto Kan, i cili më parë gjatë ditës publikoi një deklaratë ku përgëzonte ekipin për rimëkëmbjen e kurajos së vendit që u godit ashpër nga tërmeti dhe cunami i 11 marsit.